لدمجهم في المجتمع: مطبخ الخير يوزع وجبات على مرضى الجذام بالعمرانية
لدمجهم في المجتمع: مطبخ الخير يوزع وجبات على مرضى الجذام بالعمرانية
تعافى مريض الجذام يعنى قدرته على ممارسة حياته بشكل طبيعى، وإمكانية التعامل معه بدون خوف، فكرة وضعها "مصطفى عبد الوهاب" هو ورفاقه أمام أعينهم، وسعوا لنشرها بكل شكل ممكن، لدمج مرضى الجذام من جديد فى المجتمع، وكانت أول خطواتهم الدعوة لتوزيع وجبات مجانية من خلال "مطبخ الخير" على مرضى الجذام، فى العيادات المختلفة فى كل المحافظات المصرية.
مريض الجذام من حقه الاندماج فى المجتمع
"لما بيجى مصطلح مريض الجذام فى بال حد، كل اللى بيفكر فيه هو شخص مريض، لازم نخاف من التعامل معه، أو أننا نقرب منه لأحسن نتعدى منه، وده للأسف مفهوم خلى كتير من مرضى الجذام والمتعافين، فى عزلة وخايفين ينزلوا من بيوتهم، وده مش حقيقى لأن فى درجات لمرض الجذام، وده اللى بنحاول نوضحه"، كلمات "مصطفى" حول سبب توزيع وجبات مجانية على مرضى الجذام.
العمرانية كانت البداية
كان أول مكان شهد توزيع وجبات على مرضى الجذام، هى عيادات متخصصة فى علاجهم فى منطقة العمرانية، وأوضح "مصطفى" أن طريقة التوزيع تتم وفق آلية واضحة، لأن مستعمرة الجذام فى أبو زعبل ليس المكان الوحيد الذى يعالج مرضى الجذام فى مصر: "من ضمن المفاهيم الخاطئة برضه اللى بنحاول نصححها خلال مبادرتنا هى أن فى عيادات مختلقة لعلاج مرضى الجذام فى كل محافظة، ومش بس مستعمرة الجذام، وبدأنا نشرح ده للمتطوعين معانا فى المبادرة واللى عددهم وصل لـ30 شخص لغاية دلوقتي، والنهارده كنا فى عيادات فى العمرانية لتوزيع الوجبات اللى صنعناها بأيدينا".
يعتمد توزيع الوجبات بحسب "مصطفى" على حصر أهم العيادات التى تعالج مرضى الجذام، ثم الاتصال بهم لمعرفة احتياجاتهم المطلوبة وفى الغالب يكون المطلوب وجبات، ثم الأدوية، ومستلزمات شخصية: "أكثر الطلبات اللى بتيجى لينا أنهم محتاجين وجبات، لأن مريض الجذام بيقضى وقت طويل جوا الحجر، وده ماينمعش برضه أننا بنوزع أدوية ومستلزمات شخصية جنب الوجبات، لو كان فى مقدورنا، وكل شهر بنختار عيادة معينة ونوزع عليهم الوجبات".
الاعتماد على التبرعات والتمويل الذاتى
140 وجبة، بدأ "مصطفى" ورفاقه في توزيعها، بعد أن قاموا بصنعها فى مطبخ الخير كما أطلقوا عليه: "الوجبة عبارة عن رز، وربع فرخة، وخضار وثمرة فاكهة، إحنا بنصنعها بنفسنا من الألف للياء فى مطبخ الخير اللى عملناه، وبنعتمد على التمويل الذاتى والتبرعات، وكل رغبتنا أن الناس تبص لمريض الجذام نظرة تانية، فيها إنسانية واحترام وعدم خوف".
