قصائد فى حب الفلاح
قصائد فى حب الفلاح
- بيرم التونسى
- صلاح جاهين
- طول العمر
- عبدالرحمن الأبنودى
- أحزان
- بيرم التونسى
- صلاح جاهين
- طول العمر
- عبدالرحمن الأبنودى
- أحزان
بيرم التونسى
الفلاح
الأولة: عيرونى، إن أنا فلاح
والتانية: أزرع وأقلع للى نام وارتاح
والتالتة: آه اللى أحبه شط منى وراح
الأولة: عيرونى، إن أنا فلاح - بدفية
والتانية: أزرع وأقلع للى نام وارتاح - فى دهبية
والتالتة: آه اللى أحبه شط منى وراح - فى صبحية
الأولة: عيرونى إن أنا فلاح بدفيه - وعيشى حاف
والتانية: أزرع وأقلع للى نام وارتاح فى دهبية - بميت مقداف
والتالتة: آه اللى أحبه شط منى وراح فى صبحية - ما قالى عواف
الأولة: مش بإيدى دا قضا محتوم
والتانية: ومسيرها ناس تغرق وناس حاتعوم
والتالتة: ميت هم يرحل ألف هم يدوم
الأولة آه
والتانية آه
والتالتة آه
صلاح جاهين
زى الفلاحين
القمح مش زى الدهب
القمح زى الفلاحـين
عيدان نحيلة جدرها بياكل فى طين
زى اسمـاعين
ومحـمـديـن
وحسين أبوعويضة اللى قاسى وانضرب
علشان طـلب
حفنة سنابل ريَّها كان بالعرق
عرق الجبـين
القمح زى حسين يعيش ياكل فى طين
أما اللى فى القصر الكبير
يلبس حـرير
والسـنـبلـة
يبعت رجاله يحصدوها من على
عـود الفقير
عبدالرحمن الأبنودى
محنى كأنه نخلة
فلاح مصرى محنى كأنه نخلة فوق البير تطرح
وطول العمر تبدر خير
وإن كان لوحده يغنى زى الطير
ولو يشوف حد يسكت م الغنا خجلان
محنى على أرضه فى إيده الفاس
يقلب ويعدل فيها رجل وراس
يعشقها عشقه للبيوت والناس
يبوس كفوفها السمرا تاخده بالأحضان
الأرض لو غاب فلّاحها تشيل له مناب
وتحن له لو الظروف حكمت عليه بغياب
والأرض لو غمّموها تعرف الأحباب
وتوهب القيراطين أكتر من الفدان
محنى الفقير والعرق من الجبين شرار
يرسم طريقه العرق من زرعته للدار
فى زمهرير الشتا
والصيف فى قلب النار
ورغم حزن الحياة يتجاهل الأحزان
يا مصر ابنك وابن الأرض علشانا
يفلق بفاسه الصخر ويزرعه جنة
لا بيطالبنا بمال ولا يحاسبنا
جلابية للى زارعها القطن والكتان
اللى بنا مصر كان فى الأصل فلّاحها
الأرض طبعاً تموت لولا بيفلحها
من حبها تقول له اجرحنى ف يجرحها.
