إسكندرية مش غرقانة فى الأمطار.. دى غرقانة فى الفساد «واحنا ماشيين بالبركة»

12:12 ص | الثلاثاء 27 أكتوبر 2015

وُلد وعاش فى الإسكندرية، له ذكريات فى كل مكان، العمارة، الشارع، البحر، الهواء النقى، لكن كل ذلك لم يعد كما كان بالنسبة لـ«أحمد علاء أبوطالب»، فالمحافظة اختلفت كثيراً، أصبحت سيئة، فى الشتاء تغرق فى الأمطار وفى الصيف تغرق فى مخلفات المصطافين، «علاء» حصل على بكالوريوس تجارة إنجليزى منذ ثلاث سنوات، يسكن فى محرم بك، وشارك فى مسرح الجامعة، يترحم على إسكندرية زمان. {left_qoute_1}

■ ما الذى تغير فى الإسكندرية؟

- تغيرت للأسوأ، لدرجه إنى بقول لنفسى لو المسئول قاصد يفشل مش هيتصرف كده، الحلول موجودة ولكن أيدى المسئولين مرتعشة، مفيش استراتيجية على أرض الواقع تحل المشكلات الموجودة.

■ ما المشكلات التى فشل المسئولون فى حلها؟

- عدم الاستعداد للطوارئ، الصرف الصحى وأزمة القمامة والباعة الجائلين والتعليم وتلوث الهواء والزحام وغيرها.. كل حاجة فى إسكندرية بقت طعمها ماسخ.

■ هل شاركت فى ثورتى 25 يناير و30 يونيو؟

- أكيد شاركت فى الثورتين ووقفت فى اللجان الشعبية، كنا نأمل فى التغيير لكنه لم يحدث.

■ هل ترى أننا نسير فى الاتجاه الصحيح؟

- إحنا ماشيين بالبركة، بندفع تمن الفساد المتوغل فى الوزارات والمحافظات، الحال مش هيتصلح باستقالة وزير ولا محافظ، لأن المشكلة فى النظام وعدم وجود أى رؤى لتحقيق النجاح.

■ هل ترى أن استقالة محافظ الإسكندرية لن تغير شيئاً؟

- تغيير المحافظ لتهدئة الرأى العام، الموظفين نفسهم ما بيشتغلوش، لا بد من تشكيل لجنة تعمل على تأهيل كل المؤسسات والهيئات بالإسكندرية، لازم يعاد تقييم الموظفين، والفاشل يمشى غير كده مفيش حاجة هتتغير.

■ وماذا تغير فى شارع «محرم بك» الذى تعيش فيه؟

- «محرم بك» كان من أنضف شوارع إسكندرية، كنا نخرج بالليل نلاقى هوا جميل وناس مترابطة، دلوقتى الشارع بقى فيه بلطجية وزحمة وصخب، كنا بنام على صوت الترام، كنا بنحس بارتياح، دلوقتى الحال اتغير.

■ ماذا عملت منذ تخرجك؟

- حاولت إنشاء شركة شبابية مع مجموعة من أصدقائى تعمل على فصل القمامة من المنبع وإدارة المخلفات الصلبة واستخدام الفن للتوعية المجتمعية، وما زلنا نحاول.

■ هل هناك مراكز شباب ومراكز ثقافية تحتوى الشباب؟

- كتير، لكن لا تقوم بدورها فى احتواء الشباب، غير متاحة لأى شاب حتى لو موهوب، يعنى لازم تكون عارف حد عشان يديك دعم، ويدخللك المكان.

■ هل تأمل فى التغيير بعد الانتخابات البرلمانية؟

- لأ طبعاً، المجلس ده مش هيكون له صوت، أنا مقاطع الانتخابات، كل شوية يقولوا تمكين الشباب كفاية تمكين، أنا عايزهم يسيبوا الشباب فى حاله، هى الدولة بتعترف بالشباب فى سن كام؟.. أعتقد الشباب بالنسبة لهم فوق الخمسين.