كلاب وقطط وفراخ فى حدائق الرحاب.. «دى ولا الدرب الأحمر»

11:43 م | الثلاثاء 22 سبتمبر 2015

نمر، أسد، نسناس، كلاب، قطط، أرانب، ثعابين، وأخيراً دجاج، حيوانات وطيور انتشرت فى منازل بعض سكان الرحاب، دفعت البعض الآخر إلى تقديم شكاوى إلى رئيس المدينة لإنقاذ المنطقة الراقية من الروائح الكريهة قبل أن تتحول إلى ما يشبه المنطقة الشعبية.

«أنا حر» و«انت مالك أنا فى بيتى» و«من حكم فى ماله ما ظلم»، نوعية الردود التى تلقاها المتضررون من وجود حيوانات وطيور داخل المدينة، «الناس دى ماتعرفش حاجة عن الحرية، فى الأول والآخر أنت حر ما لم تضر، وأنا مضرور لما ألاقى الفراخ نطالى فى الجنينة»، قالها عبدالرحمن عوض، أحد سكان مدينة الرحاب، الذى أكد أن بعض سكان المجموعة 98 يمتلكون حيوانات مفترسة ترهب السكان بأصواتها التى يسمعونها فى الليل.

رفض «عبدالرحمن» وسكان الرحاب لوجود هذه الحيوانات والطيور داخل المدينة، لم يكن من منطلق التعنت ضد جيرانهم، بل لرغبتهم فى العيش بهدوء: «كلنا تقريباً سبنا المناطق اللى كنا فيها وجينا هنا عشان الهدوء والخصوصية والبعد عن العشوائية، مش عشان ربيت أسد ولا كلب يبقى أنا راجل متحضر ومستوايا عالى، والله خايف ألاقى خرفان العيد فى الجناين بره، تبقى كارثة». شكوى سكان المدينة لم تقتصر على وجود حيوانات أليفة ومفترسة، بل أيضاً من القمامة وهى إحدى أزمات السكان مع جهاز المدينة، الذى أكد للمواطنين أن أزمة القمامة ترجع لسلوك المواطنين وليست خطأ أو تقصيراً من المسئولين: «عندى جار عنده 5 كلاب ده ينبح وده يرد عليه، أنا مش فاهم غيتهم إيه فى إزعاج غيرهم، اللى عاوز يعيش وسط حيوانات يعيش فى صحرا مش وسط بنى آدمين». رضا فريد، مدير عام إدارة حماية البيئة بمدينة الرحاب، قال إن سكان المدينة لا يمكنهم اختراق اللوائح، التى تمنع دخول الحيوانات بجميع أنواعها داخل المدينة ومن ثم العقارات: «إحنا مدينة مرفهة، ومفيش الكلام ده خالص، واللى بيعمل كده بنقدم فيه محضر وكمان المتضرر من جاره بيروح يرفع عليه قضية وإحنا كجهاز بندعمه»، لافتاً إلى أن الجهاز طالب جميع السكان بإخراج الكلاب التى تسبب إزعاجاً للمواطنين: «اللى تم تبليغنا بيه وجود كلاب وده جارى التعامل معاه، لكن كتاكيت وفراخ محدش قدم شكوى بيها».