مصر كلها كوم والإسماعيلية كوم تانى: «إحنا أصحاب الفرح»

02:15 ص | السبت 08 أغسطس 2015

{long_qoute_1}

احتفالات تعم أنحاء الجمهورية، أعلام وأغانٍ وطنية ووجوه ضاحكة وعائلات نزلت بالكامل إلى الشارع، ولا يختلف المشهد كثيراً فى محافظة الإسماعيلية التى تشابهت احتفالات أهلها مع احتفالات بقية المصريين لكن ثمة اختلاف «إحنا أصحاب الفرح» بمزيد من الفخر رددها الكثير من الإسماعيلاوية سواء على مواقع التواصل أو على أرض الواقع فيما بينهم.

«الناس كلها فرحانة صحيح بس الصراحة إحنا أكتر محافظة حاسة بالاحتفال» يتحدث تامر صديق، المواطن الذى احتفل مع أسرته بميدان الممر: «الإسماعيلية هى مسرح العمليات، إحنا اللى بنمد الناس كلها بالصور والمعلومات، وإحنا اللى على أرضنا جه الكل عشان القناة». يقطن «صديق» بمنطقة منشية الشهداء: «منطقتى أخدت اسمها من شهداء حفر القناة الأولى، جدى صديق كان واحد منهم، جاب عيلته من سوهاج على الإسماعيلية وراح فيها، هو استشهد عشانها وأنا حفيده النهارده بشوف القناة الجديدة» فخر شديد يشعر به الرجل الذى يرى أن كل الثورات تقود إلى مدينته: «فى الأول حصلت ثورة يوليو 1952، بعدها جالنا عبدالناصر وأمم القناة، بعدين حصلت ثورة 30 يونيو وجالنا عبدالفتاح السيسى يفتح القناة التانية.. مننا ولينا والموضوع مربوط دايماً بينا». لم تعد أكثر عائلات الإسماعيلية تعرف النوم منذ عدة أيام: «لحد الفجر فضلنا سهرانين عند استراحة الريس ليلة الاحتفال، وماسيبناش ميدان الممر، البلد كلها مابتدخلش البيت» يتحدث أسامة حسن الموظف بغرفة عمليات المحافظة، عمله الذى استدعاه للعمل يوم الاحتفال من الثالثة عصراً وحتى العاشرة مساءً جعله يحتفل قبيل الحدث بعدة أيام: «أنا وصحابى فرحانين جداً، طول الوقت بنلقط صور للمحافظة وننشرها لباقى أصحابنا فى المحافظات التانية» أغانٍ ومكبرات صوت وطائرات بالأجواء: «زعلنا كتير أوى، وماصدقنا نفرح أخيراً.. عشان كده فرحانين أوى».