لوحات فرعونية من وحى حفل «موكب المومياوات»: التاريخ يشهد على عظمة مصر

11:08 ص | الخميس 08 أبريل 2021

سيظل موكب نقل المومياوات الملكية، مشهد عالق في أذهان الجميع، يذكرنا بهويتنا وثقافتنا الحقيقية، وبمكانة مصر بالنسبة للعالم، الذي وقف مذهولًا وهو يتابع الحفل الذي نقلته 400 قناة تليفزيونية.

تابع باسل القاضي، خريج كلية الهندسة جامعة عين شمس دفعة 2012، الحفل بشغف، وعبر عن فخره بالقدماء المصريين بمجموعة من الرسومات، يحكي عنها بقوله: «طول عمري كان نفسي اني أكون عايش في زمن المصريين القدماء وده سبب رسوماتي الكثيرة المتأثرة بهم، ومن أكثر أمنياتي اني أصمم شخصيات لفيلم كرتون بتدور أحداثه في زمن مصر القديمة أو اني أشتغل على سلسلة من كتب الأطفال تتكلم عن تاريخنا الفرعوني علشان أولادنا يحبوا يتعرفوا على تاريخنا ويكونوا فخورين به».

بدأت هواية «باسل» في الرسم منذ صغره، لكنه قرر الاحتراف منذ 6 سنوات: «بدأت أعلم نفسي من على اليوتيوب وبعد كدة بدأت أقوي نفسي أكتر وأتطور أكتر عن طريق كورسات من رسامين من ديزني زي Aaron Blaise وNathan Fowkes، رسمت أكتر من 8 كتب أطفال لكن للأسف مش في مصر أو الوطن العربي، شغلي معظمه مع كتاب كتب الأطفال الأمريكيين واشتغلت في أكتر من بروجكت كمصمم للشخصيات».

بكل فخر يتحدث «باسل» عن سعادته باحتفالية موكب المومياوات الملكية: «كنت فخور جدا ان العالم كله قدر يشوف الاحتفالية وان شاء الله متأكد اننا هنشوف عروض زي كدة كتير قدام، الجزء اللي غنت فيه أميرة سليم كان من أكتر الأجزاء المفضلة ليا بسبب اني أول مرة أسمع لغتنا القديمة وكمان أداء أميرة سليم مع الموسيقى الرائعة كانت تجربة عمرها ما تتنسي ولسة بسمع الجزء ده أكتر من مرة كل يوم وأنا برسم».

رسم «باسل» بورتريه لأميرة سليم وهي تغني في الاحتفالية، لشدة اعجابه بأدائها: «الرسمة أخدت مني ما يقرب من 7 ساعات ورسمتها ولونتها تلوين ديجيتال على الـipad، ونالت اعجاب الكثير الحمد لله».

أنشأ «باسل» قناة على موقع «يوتيوب»: «نفسي إن عدد الرسامين المصريين يزيد أكتر عشان إحنا من أوائل الشعوب اللي علمت الناس الرسم، وده سبب اني عملت قناة على اليوتيوب بحاول فيها اني أعلم الناس كل حاجة اتعلمتها ومتأكد اننا نقدر نرجع الأحسن في المجال ده أن شاء الله».