بائع استوقف موكب السيسي: الرئيس عملي معاش.. وقالي اللي أنت عايزه هعملهولك

09:42 م | السبت 06 مارس 2021

قال عواد وهبة، أحد الباعة الذين استوقفوا موكب الرئيس عبدالفتاح السيسي، أمام مكتبة حديقة الطفل في مدينة نصر، إن الرئيس السيسي كان واقفًا عند بائع فاكهة، «الراجل ده كان ورايا، فرحت للرئيس وكلمته ومكنتش مصدق».

وأضاف «وهبة»، خلال مداخلة هاتفية في برنامج «حضرة المواطن»، مع الإعلامي سيد علي، على شاشة «الحدث اليوم»، أنه ذكر للرئيس السيسي أن سيارته التي كان يبيع عليها أخذتها قوات المرور، «كسروها ومحدش إدهالي، أنا بقف عند شارع أحمد فخري عند حديقة الطفل، الرئيس قالي بشوفك من 20 سنة».

وتابع: «قلت للسيسي أنا والله هنا بقالي 34 سنة، الرئيس قال لي عاوز إيه بالضبط، قلت له عاوز تروسيكل بدل العربية، قال لي أنا هنا تؤمرني، اللي إنت عاوزه كله هعملهولك، والله العظيم تلاتة قالي كدة، قالي إنت تؤمرني يا عم عواد بأي حاجة، وبعت ناس من رئاسة الجمهورية بعدها بساعة وكلم بتوع الحي والمحافظ».

وواصل: «أقسم بالله السيسي مخلاش حد إلا لما كلمه عشانا، الله يكرمه ويخليله عياله، السيسي هيجبلي تروسيكل، وبعت لي يعملي معاش في الشؤون الاجتماعية، لأنهم كلموني وقالولي هنعملك معاش، الله يكرمه والله، فيه كمان واحد بيقف بعدي شوية بتاع حرنكش هيجيبله تروسكيل، رغم إنه مكلمش السيسي».

وأوضح أن هناك شخص يُدعى محمد، كان الرئيس السيسي يعرفه من زمان، «عربية من وزارة الصحة خدوه ودوه المستشفى من امبارح، عمالين يكشفوا عليه ويعملوا له كل حاجة، ربنا يكرمه ويقويه، مشوفتش رئيس جمهورية بالوضع ده، والله أنا ما نمت من إمبارح، مش مصدق إني قابلت رئيس الجمهورية، وكل التليفزيونات جات صورت معايا، ومش مصدق الاهتمام ده كله بيا».