فيديو.. طبيب "حفناوي" ينفي وفاته بسبب مكملات غذائية: جاله تجلط في الدم

01:18 م | الأربعاء 12 أغسطس 2020

تداول مستخدمو مواقع التواصل الاجتماعي، فيديو قيل إنّه لأحد الأطباء الذين عالجوا مصطفى حفناوي، اليوتيوبر الشهير، بعد أن زعم أصدقاؤه أنّ مرضه جاء بسبب تشخيص خاطئ من أحد الأطباء، وبعد أيام من بقاء "حفناوي" في المستشفى أُعلن خبر وفاته، وسط حالة من الحزن انتابت رواد مواقع التواصل الاجتماعي.

وقال الطبيب في الفيديو الذي سُجل له خلسة ودون علمه: "أنا مقدر اللي انتو فيه وآسف جدًا على اللي حصل وربنا يصبر أهله، بس افهم الموضوع بالتفصيل عشان تقدر تقيم الموضوع".

وتابع: "مصطفى جه المستشفى الساعة 1 ونصف الصبح بيشتكي من ألم في بطنه، وطلبنا منه يدخل المستشفى عشان يعمل فحص ونعرف سبب الألم، رفض ومضى على خروج حسب طلبه، لأننا مانقدرش نجبر حد يدخل المستشفى غصب عنه".

وأضاف: "إحنا نقدر ننصحه ونقول إنّ فيه خطورة على حياته لو ساب المستشفى، لكن لو عاوز تمشي امضي إنك هتمشي على مسؤوليتك، ورجع بعد كذا ساعة ووافق على الدخول وبدأنا نجهزه يعمل أشعة مقطعية بالصبغة، عشان نشوف سبب الألم إيه".

وأضاف الطبيب: "للأسف وإحنا بنعمل له الأشعة المقطعية بدأ يرجّع وماقدرناش نعمل الأشعة"، وفي هذه الأثناء استشعر الطبيب أنّه يتم تصويره، وتساءل عن صحة هذا، لكن مصور الفيديو نفى الأمر، فقال الطبيب: "حتى لو بتصورني أنا بقول اللي يمليه عليا ضميري ومش هخاف من حد".

واستكمل الطبيب حديثه: "مصطفى بعد ما رجع وماعملناش الأشعة لأننا بنقعد نجهز في الأشعة دي حوالي 5 ساعات، لأنه بيشرب صبغة عشان توصل للقولون، وبعد ما بدأ يرجّع بدأ يحس بتقل في إيده ورجله، وحصل تدهور، وعملنا له أشعة مقطعية وظهر إن عنده جلطة كبيرة جدًا في المخ وانسداد في الشريان".

وزاد: "فورًا دخل الرعاية المركزة واتعمل له كل الحاجات الممكنة، ووقتها ماقدرناش نديله مذيبات للجلطة اللي كان حجمها كبير جدًا، لأن لو كنا عملنا كده كنا هنبقى بنضره مش بننقذه، والحل التاني نعمل له قسطرة واستشاري العلاج التدخلي قال مستحيل ينفع يتعمل له قسطرة لأن الشريان مقفول والقسطرة مش هتدخل".

وأكمل: "عملنا كل الممكن في حالته ودورنا على سبب الجلطة، والفحوصات كلها أثبتت إن عنده مشكلة جينية في تجلط الدم، الدم كان بيتجلط بسرعة من غير سبب، وده سبّب له تجلط في الشريان السباتي".

وأتمّ الطبيب: "مش طبيعي حد عنده 25 سنة حتى لو كان مدخن زي مصطفى أو بياخد مكملات غذائية وهرمونات وغيرها من الحاجات الخاصة ببناء الجسم والعضلات، تجيله جلطة في المخ بالحجم ده، السبب الأساسي لمشكلته هو تجلط الدم".