بريد الوطن.. أنا الدُّمية
بريد الوطن.. أنا الدُّمية
أشد الخيط فيتحرك..
أبص عليه ألاقى عيونه بصالى
بتضحكلى
أشد يمين.. وألمح وشه فجأة حزين
ومستغرب أوى شكلى
أشد كمان.. وأسمع صوت موسيقى جنان
وأمشى معاه على المسرح
أروح وأسرح
ف نظرة لهفة م الجمهور
أشد أكتر وأعيش الدور
لكن فجأة فيه خيط ماسكاه بيتقطع
واقع ع الأرض ف وقت مكنش متوقع
أحاول أقوم مبقدرش
وليه الجمهور مسقفش
أحس إيديه بتربط خيطه من تانى..
ويمشى وحيد وينسانى
أبص عليه ما اشوفش عنيه
وأحس كأن أنا عامية
وألاقى ف إيده خيط تانى
واكتشف إن أنا الدمية
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي bareed.elwatan@elwatannews.com
