«سراج الدين»: أطالب الدولة بتوفير وظائف ومسكن ملائم لنا

09:34 م | الثلاثاء 23 أبريل 2019

«خايف لما أخرج من دار الرعاية ملاقيش بيت أعيش فيه»، بهذه الكلمات بدأ سراج الدين خليل حديثه لـ«الوطن»، قائلاً «تخرجت هذا العام فى كلية اللغة العربية شعبة تاريخ وحضارة جامعة الأزهر، والتحقت بدار رعاية «جمعية الحصرى» فى السادس من أكتوبر من عمر سنتين لحد سن الـ18 سنة وبعد بلوغى هذه السن انتقلت لدار رعاية لاحقة للخريجين والمفترض عند بلوغى 24 عاماً سيكون غير مسموح لى بالإقامة فى الدار لأن دى القوانين بالنسبة للذكور»، وتابع «خايف لما أخرج من الدار ملاقيش بيت لأن صعب دلوقتى إنك تلاقى شقة تمليك أو حتى حق انتفاع وخايف إنى أبقى غير قادر مادياً على تسيير أمور حياتى أو إن المبلغ اللى اتحوش ليّا داخل الدار من فلوس التبرعات ميكفيش أى حاجة، وأنا لحد دلوقتى متحوش ليّا فى دفتر التوفير 60 ألف جنيه، وكل شخص داخل الدار بيبقى موجود ليه دفتر توفير بيتحط له فيه مبلغ سنوياً وبياخده وهو ماشى من الدار، وأتمنى على ما أكون كونت نفسى ميكونش العمر عدى»، وأضاف سراج قائلاً «معظم الدور تقع فى مشكلة وأنها تهتم بالجزء المادى ويتم تجاهل الجزء المعنوى بشكل تام، وقال «تعرضت للسخرية والتنمر مرات عديدة سواء فى المدرسة أو فى الحياة عموماً، والموضوع دايماً كان بيضايقنى سواء وأنا طفل وحتى بعد ما كبرت وتخرجت وماكنتش برد عليهم وبكتفى إنى آخد جنب وأبكى لأنهم بيحاسبونى على حاجة أنا معملتهاش ولا ليّا دخل فيها، وأنا شايف إنى مميز وحالى أحسن من ناس كتير، وسواء أنا جيت عن علاقة غير شرعية أو جيت بعلاقة شرعية ولكن أهلى تركونى، فمعناه إنهم أشخاص غير سويين وبالتالى الحياة معهم أيضاً كانت هتكون صعبة وقاسية».