جماهير "السوشيال ميديا" عن "أمين وشركاه" بعد الحلقة الـ5: مبهج ومحترم
جماهير "السوشيال ميديا" عن "أمين وشركاه" بعد الحلقة الـ5: مبهج ومحترم
ما إن تم عرض الحلقة الخامسة من مسرحية "أمين وشركاه" والتي يقدمها الفنان أحمد أمين، حتى انهالت عبارات الثناء والإعجاب من جمهوره على مواقع السوشيال ميديا والتي عكست مدى سعادة الجمهور بما يقدمه "أمين" من كل جديد في عروضه الأسبوعية.
قالت "ضحى": "ماما كلامها مهما اتكرر ميزهقش.. مالها كرامتي تهزيق مامتي ما بيلزقش"، موضحه "عرض جديد مبهج تاني.. شكرا ليك كتير بجد".
وقالت "سيلينا": "مكنتش اتخيل للحظة أن أول مرة حرفيا أكسب حاجة في حياتي تكون هي أكتر أمنية كان نفسي فيها.. ومش السنة دي، بس دي من أول مرة اتفرجت على البلاتوة و بأمانة أنا بعتبر حضرتك قدوة ومثال مشرف للفنان اللي بيحترم جمهوره النهاردة كان يوم عظيم رغم أني كان نفسي أشوف حضرتك"، وأضافت "فيه عروض تستاهل فعلا 6 ساعات مواصلات و سفر وأمين وشركاه واحد منهم".
وقالت "زهير ناصر": "من أسبوعين تقريبا حد من اللي حضر مسرحية المرجيحة وصفها بالعظيمة ومن ساعتها وانا مستني اشوفها... والحقيقة كلمة عظيمة شويه جدا عليها العظيم أحمد أمين مسابش فيها فرصة للانتقاد تماما بعض الافيهات حسيت إنها إعادة من البلاتوه لكن على مين.. مش أمين اللي تعدي عليه حاجه زي دي".
بينما قالت "ياسمين سالم": "بالنسبة لي كان ممثل كوميدي لطيف بس مش مفضل أوى حضرتله الجمعة اللي فاتت أمين وشركاه بصراحة المسرحيتين كانوا أحلى من بعض.. حقيقي انبهرت بيفاجأني أنه فعلا رائع ومثقف وأظن لسه عنده كمان وبقى مفضل جدا".
وقال "ميني نون": "مرة وحدة في الأسبوع قليّل اوي على الضحكة اللي بنقعد طول الاسبوع مستنيينها ... العرض دا عاوز يتكثف يبقى كل يومين حتى مش كده!، أمين وشركاه والله طول الاسبوع قاعده أفكر هيعمل ايه؟".
وقالت "أية الألفي": "حلاوة أحمد أمين وهو بيعمل مزيج كده من التمثيل والغنا والعزف والاستعراضات.. إحساس أن حد بيعمل حاجة بيحبها فبيطلع كل إمكانياته فيها بأريحيه.. ده شيء مُبهج شوفت نفسي مكانه لثانية وأنا بعمل كل اللي بحبه.. وبتمني أوصله، دمت بتضحكنا ودمت آمين على فرحتنا والله!".
وقال "تيفانو": "الفكرة مش إنك ممثل فقط ولا فنان كوميدي بس الفكرة انك شامل، متجدد، ضحك من القلب، افيهات ليست متكررة، نمط مسرحي غير متكرر، كل مسرحية تلو الأخرى تضحكنا وتزيدنا متعة للمسرح ،وبجد مبرووووك على المصريين المسرح اللي بجد".
وقالت أحدى حاضرات عرضه في المسرح "علياء سعيد": "عايزة اروح بسرعة من المسرح عشان الحق أشوف الحلقة الجديدة على dmc، المسرح كان تجربة رائعة جدا، شكرا أحمد أمين".
وقال "مُسمَار": "أحمد أمين بيأكد بكل عمل بيقدمة وكل حلقة وكل كلمة وكل مشهد إنه غير طبيعى، موهوب ومُبدع بيقدم فن هادف غير مُبتذل وبيقدم مضمون محترم وكوميدى فوق الخيال".
فيما قال "أحمد الليثي": "بصراحه أمين و شركاه حاجه محترمه وعظيمه ومضحكه جدا جدا، أحمد أمين كومديان من طراز العظماء".
