بالفيديو| «إيمان».. حارسة عقار تهوى الرسم: بيهوّن علىّ كتير

08:37 م | الثلاثاء 12 مارس 2019

على فرشة بسيطة داخل غرفة صغيرة تحت بئر سلم عمارة سكنية بمنطقة شبرا، كانت منهمكة فى رسم صورة بحثت عنها فى المجلات المختلفة والكتب التى تجمعها من سكان العمارة التى تعمل فى حراستها مع زوجها.

حياة هادئة تعيشها إيمان مسعد، الشهيرة بـ«أم دعاء» مع زوجها، الذى يدعم حبها للرسم بشراء ألوان وكراسات ترفه عنها، بعد أن تركت أهلها بمحافظة الفيوم، وسافرت مع زوجها للعمل فى القاهرة.

«اتجوزت أشرف عن حب، ومستنية الخلفة بفارغ الصبر، وندرت لو خلفت بنت هسميها دعاء، عشان كده بخلى الناس تنادينى بأم دعاء، وكمان عشان مايصحش حد ينادينى باسمى»، تقولها صاحبة الـ21 عاماً، التى تبدأ عملها فى الصباح الباكر، بشراء احتياجات سكان العمارة حتى المساء، بينما ينشغل الزوج بالعمل فى مطعم، وتختلس بعض الأوقات التى تشعر فيها بالضيق، وتقوم بالرسم والتلوين: «بقعد على الأرض، وأحط مخدة على رجلى، وأرسم الصورة اللى تلفت نظرى وتشدنى».

بورتريهات المشاهير والشخصيات الكرتونية أكثر ما يجذب «إيمان» لرسمه، منذ أن توقف تعليمها عند المرحلة الإعدادية، وتزوجت فى سن صغيرة، مستغرقة فى الرسمة الواحدة ما يقرب من ساعة ونصف، حسب تفاصيلها: «بشوف أهلى فى المناسبات وبس، وساعات كتير بحس إنى متضايقة وزعلانه، فبطلّع حزنى فى الرسم، وبيهوّن علىّ كتير، خاصة إنى ماعنديش صحاب خالص، ولما بيبقى معايا فلوس زيادة بروح أشترى كتب الرسم والتلوين عشان أتعلم منها».