"لو ناوي تفتح مشروع".. 6 نصائح عليك اتباعها

07:41 م | الثلاثاء 22 يناير 2019

يحاول الكثيرون إنشاء مشروع خاص بهم لزيادة الدخل، سواء بسبب قرار تغيير مجال عملهم أو لعدم وجود وظيفة مناسبة لهم.

ويقدم مصطفى خليفة، استشاري تطوير الأعمال لـ "الوطن"، بعض الصفات لاختيار المنتج أو الخدمة، التي لا بد أن تتوفر لدى الشخص، الذي يرغب في إنشاء مشروع لضمان نجاحه.

1. تكون بتحبه من قلبك

"تكون بشكل شخصي بتحب المنتج ده أو الخدمة لأن اقتناعك بيها هيخليك تعرف تطورها وتسوقها، ده غير أنها هتشجعك على إنشاء الشركة وتصبرك على العقبات اللي ممكن تقابلها خصوصا في بداية التأسيس".

2. بتفهم فيه

"لازم تكون بتفهم في المنتج اللي هتقدمه عشان تقدم حاجة فعلا بتضيف قيمة لعميلك المتوقع ويكون منتجك متميز عن المنافسين".

3. لديك الخبرة

"مهم يكون عندك الخبرة الكافية إزاي تدير المشروع، وده بتيجي من فترة شغلك في الوظايف المختلفة قبل ما تفتح شركتك".

4. مش زهق وخلاص

"مش عشان زهقان من الشغل بتاعك تفكر تفتح شركة، لازم يبقى عندك الرغبة الحقيقية عشان المشروع هياخد وقت ومجهود، وكمان القدرة المادية والخبرة اللي تأهلك لفتح شركة".

5. تدرس سوقه

"تشوف مين اللي بيقدم منتجات شبه منتجاتك وإيه مواصفاتهم وإزاي بيبيعوه وبيتباع بكام، لازم تعرف نقاط قوتهم وضعفهم ونقاط قوتك بالنسبة لهم وميزتك التنافسية".

6. مين هيشتريه

"لازم تعرف مين ممكن يشتريه ويدفع فيه التمن اللي هتحدده، مهم أوي تعرف مين عملائك وليه هيحتاجه منتجك وإيه اللي يخليهم يشتروه، وممكن يدفعوا فيه كام".