حلوى «مولد النبوى» بأسعار العام الماضى: الأسواق استعدت للموسم.. مش فاضل غير الزبون

09:58 م | الخميس 01 نوفمبر 2018

أيام تفصلنا عن ذكرى الاحتفال بالمولد النبوى. الأسواق استعدت بكميات كبيرة من الحلوى والعرائس، التجار حرصوا على عرض أنواع وأشكال جديدة تجذب انتباه الزبائن، خاصة الذين اعتادوا شراء الحلوى كل عام. فى شارع «بين الحارات» برمسيس، عمل محمد سالم محمود على تنظيم وعرض حلوى المولد على الفرشة أمام محله.. وضع فى المقدمة حلوى على شكل أنواع مختلفة من الفواكه، خوخ، موز، تفاح، وفراولة بحجم واحد، العلبة منها تساوى 7 جنيهات، وهى عبارة عن جوز هند، توضع عليها ألوان ومواد حافظة، لتصبح حلاوة بشكلها الحالى: «فيه جديد حلاوة فاراماسيه بالفانيليا والشيكولاتة، وشكلمة بالقشطة، وقشطة حلقات، وكل كيلو من أى نوع بـ50 جنيه». كما يعرض حلاوة على شكل مركب سعرها 45 جنيهاً.

حبه الشخصى للجمال، قاد مصطفى شرطة لابتكار أشكال مختلفة من العرائس التى على شكل جمل: «عندى جمل واقف على قاعدة خشب ملونة وحواليه قلوب اسمه جمل الحنطور، وعندى جمل راكب عليه عرباوى، وجمل راكب عليه عروسة بجلباب سعودى، وغيره بأزياء مختلفة».

{long_qoute_1}

أسعار الجمال المختلفة تتراوح بين 130 و150 جنيهاً، يعرض أيضاً عرائس مولد بشكل مختلف، منها المرجيحة التى تجلس على عربة، بالإضافة للأشكال التقليدية: «عملت الشغل ده فى منوف، وهنزّل قريب عرايس على شكل ألعاب كارتونية، والسعر معظمه معقول».

عدم وجود أزمة سكر، كالتى أضرت موسمهم من قبل، هو سبب تفاؤل كريم حافظ: «السنة دى، اللى خُفنا ننزله قبل كده نزلناه، والأسعار كويسة»، يتفاءل «كريم» بالأيام المقبلة التى يتوقع أن تشهد إقبالاً، خاصة على الأنواع غير التقليدية: «عندى شكلّمة بالشيكولاتة، ونوع قشطة بالسودانية، وفيه بالكريمة، الناس زهقت من الأنواع العادية زى الحمصية والفولية».

تعرض إيمان على، عروسة راقصة على أنغام الموسيقى، وغيرها من أنواع لم تفرش منها العام الماضى: «الناس بتحب التجديد، والأسعار السنة دى أقل من السنة اللى فاتت». الكيلو المشكّل على فرشة فتح الله محمود يبدأ من سعر 20 جنيهاً: «فيه أنواع أغلى زى العلب الرفايلو، وبتبقى هشة وعبارة عن جوز هند، وفيه كرسبى، وفولية بالشيكولاتة البيضا، والكيلو المشكّل منها بيساوى 50 جنيه».