على طريقة "جمبا" اليابانية.. إزاي تحسن عملك أسرع في 10 خطوات

01:58 م | الخميس 28 يونيو 2018

يواجه الشخص الكثير من المشاكل خلال يومه، وكل ما عليه أن يحاول حلها بشكل سريع سواء في العمل أو أي شيء آخر.

هناك العديد من الأساليب أن الشخص يحسن من عمله ولكن لتكون بشكل أسرع فعمل اليابانيين طريقة أطلق عليها اسم "جمبا" أو "Gemba" ومعناها أنك تروح للمكان الحقيقي، "وده لسبب مهم جدا.. أننا لما بنقرب من المكان اللي بيتم فيه الشغل الحقيقي بيبقى سهل علينا نشوف الحقيقه وتبان قدامنا فرص التحسين، لكن الكلام من بعيد بيبقى أسهل ومش بيبقى واقعي"، وفقا لما قاله مصطفى خليفة استشاري تطوير الأعمال لـ"الوطن".

ويٌقدم خليفة 10 خطوات للتفكير بطريقة "جمبا" لتحسين العمل بشكل سريع كما يلي:

1. في البداية لازم نحدد المشكلة اللي عايزين نحلها ونعرف أدق تفاصيلها، من غير ما نبعد عن البعد الأساسي فيها.

2. تحديد الخطوات اللي لازم نتبعها في حل المشكلة وفقا للمراجع أو التجارب السابقة للآخرين

3. إيه الصعوبة اللي بتواجهها دلوقتي، لازم أعرف أنا أو الناس بنشتكي من إيه، لو الحاجة دي خاصة بعميل معين أو اشخاص محددين لازم أقعد معاهم واسمع منهم.

4. إزاي بتعرف الصعوبة، لازم تعرف حجم المشاكل والصعوبات اللي قدامك عشان تعرف هل تستحق استثمار وقت وفلوس لتحسينها ولا لأ.

5. إيه اللي تقدر تصلحه، لازم تدرس إيه اللي ممكن تصلحه وفي وقت قد إيه وبتكلفة شكلها إيه، عشان ده هيحدد لك حجم التحسين اللي هتقدر تعمله.

6. إيه اللي مش هتقدر تصلحه، مهم قوي زي ما تدرس إيه ممكن يتعمل، أنك تدرس إيه اللي مش ممكن يتعمل، أوقات تحسين بسيط بيتطلب تغييرات كبيرة زي بنيه تحتية أو استثمارات ضخمة، فلازم تبقى عارف إيه الحاجات اللي مش هتقدر تعملها.

7. مين اللي محتاج تكلمهم عشان تحسن، لازم تعرف مين المعنيين بالأمر اللي انت محتاج تكلمهم قبل ماتقوم بعملية التحسين، مهم قوي تعرف مين الأشخاص اللي بيتأثروا وبيأثروا على شغلك، لأن إدارتهم بشكل صحيح سواء بالتواصل معاهم أو بإقناعهم أو بمعرفة متطلباتهم من الحاجات المهمة.

8. هل بتستخدم إرشادات مرئية، مهم جدا أنك في إجراءات التحسين تستخدم إرشادات مرئية زي اليفط أو الألوان أو الإشارات، لأنها بتسهل التنظيم وكمان بتحافظ عليه لأنها بتبقى عادات.

9. طبق بسرعة وادرس النتائج وحسن، مهم جدا أنك تطبق بشكل سريع حتى لو بشكل جزئي، وده بيخليك متضيعش وقت كبير في الحسابات، أكيد احسب بس متضيعش وقت كتير وجرب، وادرس نتايج التجربة، لو لقيتها إيجابية عمم الفكرة ولو لقيتها سلبية يبقى استفدت أن الطريقه دي مش هتنفع وهتلحق تجرب غيرها، ومتحاولش تجيب الفكرة الكاملة، لأن مفيش حاجه كاملة، جرب وطبق وحسن مع الوقت.

10. إزاي تحافظ على التحسين، مهم قوي وإنت بتحسن إنك تفكر لقدام وهو إزاي تحافظ على النتائج، مهم تفكر إزاي الحل بتاعك يبقى مستدام وينفع يبقى عادة عن الناس ويتعودوا على تنفيذه بشكل مستمر.