10 خطوات على المدير اتباعها لتقويم الموظفين بعد الأخطاء
10 خطوات على المدير اتباعها لتقويم الموظفين بعد الأخطاء
أحيانا يجد المدراء أو مسؤولون فريق العمل بعض الموظفون أدائهم غير جيد، أو هناك مشاكل في طريقة عملهم، فشرح مصطفى خليفة استشاري تطوير الأعمال لابد من تقويم الشخص وتحسين أداءه.
وفيما يلي 10 خطوات تساعد على مواجه مشكلة الموظف ويستطيع المدير من خلالها حلها بطريقة صحيحة:
1. مواجهة الموظف بشكل فردي بعيدا عن الزملاء في العمل
لما تتكلم مع الموظف اللي عندك ملاحظات على أداءه، بشكل فردي بيخليه اكثر تقبلا للنقد، لكن لو اتكلمت معاه قدام الناس هيبقى في موقف دفاع عن النفس ومش هيسمع نقدك له وهيشوفه على أنه هجوم.
2. المواجهة سريعا، أول ما تحصل المشكلة أو مشاهدة الملاحظة
متخليش المشكلة تتراكم ويمكن تكبر، وممكن رد فعلك يختلف مع الوقت لو حصلت اكتر من مشكلة، فبدل ماتخزن وتنفجر مرة واحدة حاول تاخد المشكلة أول بأول.
3. لا تجعل نقدك له عبارة عن رد فعل
صحيح ماتستناش كتير، بس برده ميبقاش رد فعلك لحظي لأن من الممكن تكون متعصب أو متأثر بالمشكله بشكل زيادة، حاول تهدى وترتب افكارك واقعد معاه.
4. تحدث عن مشكلة مشكلة
متجمعش المشاكل وتتكلم عنها كلها، حاول تواجه مشكلة مشكلة كل واحدة لواحدها، عشان ميحسش أنك بتعمم أو أن مفيش حاجة عجباك وبالتالي هيحس أن مفيش حاجه يقدر يعملها عشان يرضيك.
5. تحدث عن المشكلة وليس عنه
لأنك عايزه يتغير فبالتالي القي اللوم على المشكلة مش عليه، لأنك لو قلتله أنه غلطان خلاص مش هيعمل حاجه، لكن لو قلتله أن فيه مشكلة حصلت هيفكر إزاي يحلها مش أنه هو فاشل.
6. ابتعد عن التهكم
التريقة أو الأسلوب الاستفزازي مش هيوصل لحاجة غير للعند، وبالتالي اختار اسلوبك صح اللي فيه النصيحة قبل اللوم، وهنعمل إيه قدام قي المستقبل اكتر من ليه معملناش ده في الماضي.
7. امتنع عن التعميم
متعممش على كل المواقف أو أن عمرك ماعملت كذا، حاول تكون منصف واذكر الكويس والوحش، هيحس أنك فعلا بتتكلم صح وأنك مش بتنقضه لشخصه ولكن بتنقضه لفعله.
8. اسأل كتير
أسلوب السؤال ومعرفة وجهة نظره إيه وأنك تديله مساحة أنه يرد ويفكر من الحاجات المهمة، لأن ده بيخليه يدرك المشكلة ويستوعب النقد، لكن لو كله كلام من اتجاه واحد هيسمع شوية وبعد كده هيبتدي يسمع بشكل انتقائي فمش هيفهم كلامك ليه.
9. متتأسفش
لأنك بتديله نصيحة مش بتعمل حاجة غلط، لازم تفهم أن الأفادة بتاعتك عن أداءه دي هدية. فلازم تديهاله بشكل صحيح، فلا تلقيها جبلا ولا تجعلها جدلا.
10. اجعل أسلوبك بناء
دايما اجعل اسلوبك بناء، ابتدي بشكره على الحاجات الكويسة اللي عملها وبعد كده اتكلم عن المشاكل واسمع منه ليه حصلت وإزاي نحسنها، وبعد كده اشكره على تقبله للكلام وإزاي نحسن الأداء في المستقبل، ده بنسميه السندوتش (شكر ثم نقد ثم شكر) هيوصله أنك عارف الإيجابيات وبتتكلم معاه في تحسين السلبيات وإزاي يحسنها في المستقبل.
