مسحراتي اليوم الرابع والعشرين

كتب: فؤاد حداد

مسحراتي اليوم الرابع والعشرين

مسحراتي اليوم الرابع والعشرين

وانا صنعتى

مســحـراتى

فى البلد جوال

حبيت ودبيت

كما العاشق

ليالى طوال

وكل شبر

وحتة من بلدى

حتة من كبدى

حتة من موال:

مسحراتى

منقراتى

يا سيداتى

وسادتى

بعد التماسى

أنا التماسى

يدوم حماسى

وعادتى

أنا قلب أخضر

بفروع تجرجر

من الشجرجر

مودتى

من غير أذية

صاحب مزية

وأستاذية

فى مادتى

وأنا فى انسجامى

ما أنساش لجامى

تحكم كلامى

إرادتى

وباقول يا قافية

المعنى أفيد

ولا حرف أزيد

عن حاجتى

وانا اللى مؤمن

بالله ومؤمن

بالإنسانية

وبالتى

كأنى من يوم

ولادتى

المشى طاب لى

والدق على طبلى

ناس كانوا قبلى

قالوا فى الأمثال

الرجل تدب مطرح ما تحب

 


مواضيع متعلقة