مسحراتي اليوم الرابع عشر
مسحراتي اليوم الرابع عشر
وانا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحتة من بلدى
حتة من كبدى
حتة من موال:
مسحراتى صاحب ندا
منقراتى كدا كدا
فى إيدى طبلة مجوِّدة
أمشى على ريحة الندى
والنسمة فى الجوّ مُنشدة
توالى موالى والحدا
يا مصر يا واحة مسعدة
نطقت والفجر كان صدى
حتى الشجر فى الحجر شدا
لما بدأت التاريخ بدا
لِحمة وطول الزمن سِدى
إنتِ الأميرة المجاهدة
الإنسانيّة أم الفدا
أم الحضارة يا والدة
ضميتِ الأزهر والسيدة
وألف مادنة يداً يدا
سياج لأمة موحدة
يا مصر عيشى على المدى
واهدينا ثانية مخلدة
إما الشهادة أو الهدى
النصر الأكبر على العدى
يا كحل عينى يا مُنْجِدة
والمشى طاب لى
والدق على طبلى
ناس كانوا قبلى
قالوا فى الأمثال:
«الرجل تدب مطرح ما تحب».
