مسحراتي اليوم الثالث عشر
مسحراتي اليوم الثالث عشر
وانا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحتة من بلدى
حتة من كبدى
حتة من موال:
مسحراتى
منقراتى
تصدق ابنى
مصوراتى
عجب عجبنى
مطرح ما شخبط
وراه مشعبط
رسم لى شجرة
فى الحيط بتخبط
ورسم لى قمرة
من غير بَراجل
ورسم لى راجل
بيبيع بليلة
ورسم عرايس
لا مستحيلة
الرمش ناقص
لكن كحيلة
ورسم لى وردة
أوراقها فاردة
أنا عينى باردة
صحيح جميلة
ورسم لى بطة
ما تجيش ببلطة
من غير مغالطة
سحور قبيلة
تسلم لى إيده
ما هيش بخيلة
الله يزيده
قوة وحيلة
الفن سرقك
يا ابنى ورقك
تسقيه بعرقك
يصبح خميلة
وارسم لى قلة
غطاها فلة
أنا أب شاعر
مشيت أشاور
على البشاير
