بريد الوطن| حوارى مع العصفور
بريد الوطن| حوارى مع العصفور
أنا: يا عصفور..
العصفور: خير يا غريب..
أنا: أنا مش غريب، أنا من هنا من نفس البلد، بس اتغربت سنين..
العصفور: وراجع ليه، وبتسأل عن إيه؟
أنا: بسأل عن الناس والبيوت، والأماكن والجدود، ده هنا كان فيه بيّاعين وعربيات، وقهوة كنت بقعد فيها من سنين.
العصفور: ناس مين وقهوة مين، ده انت شكلك ليك سنين وسنين، الناس تركت البلد، واللى تعب من غلب السنين، واللى هاجر يدور على لقمة عيش، واللى تاه من السلطان والجاه، واللى مات.
أنا: وانت اسمك إيه يا عصفور؟
العصفور: أنا اسمى منصور.
أنا: قاعد هنا ليه يا منصور؟
العصفور: جناحى مكسور وملقتش اللى يداوى اللى انكسر، قلت أندفن هنا مع بقية العصافير.
أنا: أصيل يا منصور، طيب سلام.
العصفور: على فين؟
أنا: حأدور على بلد، وأربى الولد، وأحكى ذكرى السنين.
العصفور: خلى بالك وانت ماشى، خف المشية؛ تحت رجليك أجدادى وأهلى مدفونين.
ورجعت بعد السنين أسال على العصفور.. جاوبتْ الحيطان: ده مات من زمان.. وتحت رجليك اندفن مع الباقيين.
عمرو أبوالعطا
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
