بريد الوطن| أفكار لمعرض القاهرة الدولى للكتاب
بريد الوطن| أفكار لمعرض القاهرة الدولى للكتاب
عايز أشترى كتاب معين من معرض الكتاب، بسيطة، اسم الكتاب والمؤلف ودار النشر، تروح المعرض وتكون عارف مكان دار النشر موجودة فى أى صالة أو جناح وتدخل الصالة وتوصل لدار النشر وتشترى الكتاب، ولو عايز تشترى أكتر من كتاب هتعمل نفس الموضوع وهيبقى حظك حلو لو كانت الكتب فى نفس الصالة أو الجناح، على حد معلوماتى المحدودة مفيش حل تانى غير كده ومحدش فكر فى فكرة تانية، يعنى أنا لو عايز أشترى 10 كتب، تفتكروا هاخد وقت قد إيه؟ طبعاً ده غير المجهود والمشى، بس طبعاً التجول فى المعرض والفرجة على كتب ما سمعناش عنها وأول مرة نشوفها ونشترى شوية منهم دى حاجة حلوة، تخيلوا لو أول ما تدخل المعرض تلاقى مكان تديله أسماء الكتب اللى انت عايز تشتريها وتدفع له الفلوس ويبقى فيه هامش ربح بسيط ومعلن وحضرتك تلف فى المعرض براحتك وتبقى فاضى وعندك وقت تشوف وتتفرج وتشترى كتب جديدة عليك، وبعد ما تخلص جولتك تلاقى الكتب اللى كنت عايز تشتريها موجودة، يعنى حتى تبقى وفرت الشيل وأنت بتلف، باختصار Book Delivery بس جوه المعرض. حد يعرف لو أنا عايز أشترى كتاب من المعرض بس ماعرفش اسم دار النشر، أعمل إيه؟ يعنى فيه مكان أعرف منه الكتاب موجود فين؟ لو سمحتم عندى استفسار: ليه مفيش (حفل توقيع مقالات) زى (حفل توقيع كتاب) يعنى ليه كاتب المقال أو المفكر ما يعملش زى حفلة توقيع كده، ويبقى فيه تواصل ونقاش وجهاً لوجه، هو مالوش قراء أو معجبين؟!
محمد (واحد عادى)
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
