بريد الوطن| رسالة من القاهرة إلى صعيد مصر
بريد الوطن| رسالة من القاهرة إلى صعيد مصر
إزيك يا مّايا، عاملة إيه؟ واحشانى.. واحشنى إخواتى التِّنين، بهانة وحسين، والجاموسة عاملة إيه؟ يا ترى بتاكل زين؟ وحشانى اللمة على الطبلية، العلاوة والنملية، وكمان الزير، بيقولوا عليه هنا كولدير، ميته ساقعة وطعمها زين، وحشتنى لمتنا وإحنا بنتدفى على نار القروانة، وتحكيلنا على الغولة والجنيّة أم راسين، نفسى فى كوباية شاى على نار الكعروب، ده هنا عاملينه بفتلة، يظبط الدماغ يا دوب، أنا الحمد لله وصلت من أسبوعين، وشغلونى صحفى فى مجلة اسمها «مخالف»، وإدونى يا مّايا 100 جنيه فى أول يومين، اشتريت موبايل بكامرتين، وركبت المترو وصليت فى الحسين، ونزلت رمسيس واشتريت جزمة وشرابين، وللبت بهانة عروسة بتشتغل بحجرين. مش يا مايا خلصوا القرقوشات، ونزلت أشترى من الدكان اللى تحتينا، طلع اسمه بقسماط، قولى لأبويا مايروحش للعمدة، عشان يشوف لى شغلانة، خلاص ده هنا بيقولوا لى «يا بيه»، البنات هنا حلوة، غير اللى بنشفهم فى البلد، اللى لابسة أخضر واللى حاطة فى وشها أحمر، وانتى عاوزة تجوزينى حلاوتهم، اللى عاملة زى الكلب الجربان، ادعى لى ربنا يكرمنى، وأطلَّعك عمرة الحرمين، نسيت ما أقولك، قابلت الواد محروس، واد بخيتة وعوضين، ده بقى أمين شرطة كد الدنيا، ومعلق على كتفه شريطين، أول ما شافنى ولى وشه، أنا مش زعلان منه، أنه طلع بوشين، حابعت لك فلوس، تشترى بردعة للجحش، ده بيشيل بدل الحمل حملين، يلا ماطوّلش عليكى، سلِّمى لى على أبويا وإخواتى، كل سنة وإنتى وكل الأمهات طيبين.
عمرو أبوالعطا
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
