المصريون في رحلتهم من قطر لمصر: "10ساعات طيران وحياتنا على كف عفريت"

11:50 ص | الجمعة 07 يوليو 2017

في السابق كانوا ينتظرون وقت الإجازة من العام للعام لرؤية عائلاتهم بعد شهور طويلة في الغربة، يصلون إلى القاهرة محملين بآمال قضاء إجازة سعيدة هادئة، صاروا يذهبون إلى المطار وحلمهم الوصول إلى القاهرة لا قضاء الساعات الطويلة في المطارات وعلى متون الطائرات من دولة لأخرى.

بعد قرار قطع العلاقات، تبدلت أحوال المصريين في قطر، وتضاعفت رحلة الـ3 ساعات من الدوحة إلى مصر لأضعاف وأكثر، بالإضافة لقدر كبير من العناء: "ركبنا طيارة من قطر إلى عمان وبعدين للبحرين ووصلنا في الأخر لمصر"، بحسب بسمة محمد، المقيمة في قطر مع زوجها لظروف عمله منذ 5 سنوات.

10 ساعات، هي مدة رحلة الشابة الثلاثينية وزوجها "عبد الله"، التي قطعوها من أجل الوصول لمصر: "الأوضاع صعبة جدا، الجو حر، ومعانا أطفال تعبوا أوي في الطريق ومش عارفين إيه الحلول للمعاناة دي، لان احنا في النهاية ملناش ذنب بعد الازمة الاخيرة ولازم يبقي في حل اسرع بدل البهدلة اللي بنتبهدلها عشان ننزل بلدنا"، بحسب "بسمة".

لم تختلف معاناة "بسمة" وزوجها كثيرا عن "مريم"، بعد عناء واجته في السفر من قطر لمصر في اجازة عيد الفطر قبل اسابيع، ما دفعها لعدم رغبتها في السفر من الأساس مرة في ظل الأزمة: "بدأت أكره النزول والزيارات اللي كنت بستناها من السنة للسنة بسبب الرحلة الطويلة دي، لاننا اتبهدلنا بجد، برغم ان الرحلة من قطر لمصر في العادي اخرها 3 ساعات وبتكون طيارة واحدة، لكن دوقتي بنركب ترانزيت عشان نوصل بلدنا"، مطالبة شركات الطيران بنقلهم من الدوحة إلي مصر مباشرة لإنهاء معاناة المصريين بسبب الأزمة الأخيرة مع قطر.

تروي "مريم" معاملة أهل قطر مع أغلب المصريين المقيمين في قطر، بعد قرار قطع مصر للعلاقات ضمن قرار الدول العربية بقطع العلاقات: "الناس بتعاملنا كويس مافيش حاجة اتغيرت، بس ربنا يسترها علينا بسبب الشغل مش عارفين هيحصل إيه بعد كده، الإدارات بدأت تمشي الناس في الشغل، وممكن عقد جوزي يلغوه، فحياتنا كلنا باقت على كف عفريت".