«منير مكرم»: رمضان فاتحة خير علينا كلنا.. اتعرفنا واشتهرنا فيه

10:47 م | الثلاثاء 20 يونيو 2017

«ادينى عقلك» برنامج مقالب كوميدى رمضانى يعرفه كل المصريين، لكن ما لا يعرفه الكثيرون أن الفنان منير مكرم الذى أمتع جمهوره كثيراً من خلال هذا البرنامج الذى ارتبط فى أذهان جيل كامل بشهر رمضان، هو مسيحى الديانة من شبرا الخيمة، يستهل «مكرم» حديثه لـ«الوطن» بالتأكيد على ضرورة إعلاء قيم المواطنة: «ماكناش نعرف يعنى إيه مسيحى، ويعنى إيه مسلم، والحاجات دى، فأنا لما اتولدت كنت مصرى، لا مسيحى ولا مسلم، ولا حتى كان اسمى منير، وبنفس الشكل هموت مصرى برضو، ولو تأملنا الموضوع هنلاقى إن التراب المصرى هو اللى بيجمعنا سواء فى الحياة لما بنعيش ونلعب ونشتغل أو حتى لما نموت».

شهر رمضان فى نظر الرجل شهر خير تعم فيه روح المحبة، مزدحم بالعمل: «بالنسبة لى شهر رمضان بيكون مزحوم شغل وتصوير وحاجة مليانة بهجة وسعادة، وطول ما إحنا شغالين بيكون البوفيه موجود من الصبح، مياه معدنية وشاى وقهوة وساندويتشات، لكن بنقول لهم يا جماعة مش عاوزين البوفيه غير بعد الفطار، لأن إحنا مش وطن واحد وبس، لا، إحنا قلب واحد».

ويعتبر «مكرم» أن شهر رمضان هو فاتحة الخير عليه، وعلى كثير من زملائه: «الشهر ده فاتحة خير علينا كلنا، اتعرفنا فى شهر رمضان، واشتهرنا فى شهر رمضان، ومعظم الوقت بنقضيه عزومات ع الفطار والسحور، ومن أول الشهر بكون موجود أنا وأولادى فى النادى لحد السحور، زينا زى زمايلنا المسلمين، حتى مواعيد الأكل بتكون رمضانية».

ويضيف «مصر شم النسيم.. ومصر رمضان.. ومصر عيد الفطر.. وعيد القيامة، تختلف عن كل بلاد الدنيا، ففى مرة كنا فى بيروت وطلعنا كنيسة السيدة العذراء والصلاة كانت باللغة اللاتينية، كان معايا فنانين كبار وتصادف عيد الميلاد فى هذا التوقيت، من يومها وترسخت لدى قناعة أننى مسيحى مصرى، فعندنا مسيحية مصرية وإسلام مصرى».

لشدة تعلق الرجل بأيام الشهر الفضيل تجده يتمنى لو كان رمضان أطول من هذا: «يا ريت نعمل السنة كلها رمضان، يبقى شهر واحد فطار وباقى السنة رمضان، حتى لا نفقد الروح الرمضانية».