نصائح للخروج من الأزمة الاقتصادية: على قد «جنيهك».. اصرف

08:22 م | الثلاثاء 08 نوفمبر 2016

ألقى قرار «تعويم الجنيه» بظلاله على كل تفاصيل حياة المصريين، فالارتفاع الجنونى فى الأسعار كان أول النتائج، ما دفع بالكثيرين إلى طمأنة الناس بتقديم نصائح للتعامل مع الأزمة لتقليل التأثير المحتمل لها خصوصاً على مواطنى الطبقة الفقيرة.

«حاول تقلل استخدامك للتاكسى على قد ما تقدر»، «اعرف الأسر الفقيرة فى منطقتك وحاول تسد عنهم بعض احتياجاتهم فى التموين»، «مش لازم تشترى ملابس شتوى فى الوقت الحالى، أجّل على قد ما تقدر»، كانت هذه جزءاً من النصائح التى انتشرت على مواقع التواصل من خبراء ومواطنين عاديين، كشفت عن مدى الترابط فى المجتمع، بالإضافة إلى محاولة التعامل مع الأزمة بوعى.

{long_qoute_1}

«نصيحة للعائلات المصرية، الفترة اللى جاية هتكون صعبة جداً من الناحية الاقتصادية، مستويات ارتفاع الأسعار هتكون غير مسبوقة، الناس دلوقتى بتشتكى من الأسعار ومتصورة إن اللى حصل فى آخر كام شهر ده جنان، الكلام ده هيأثر على القوة الشرائية للناس اللى هتنخفض بشدة»، نصائح قدمها عمر الشنيطى، المحلل الاقتصادى، محاولاً تقديم حلول عملية تقلل من أى تأثير سلبى لقرار تعوم الجنيه.

وأوضح «عمر» موقفه قائلاً: «للأسف كتير من الرجالة فى مجتمعنا بياخدوا الموضوع على صدرهم ومن الهمّ اللى بيشوفوه يطلعوا الكلام ده على بيوتهم وولادهم، وده بيكون سبب لحالات انفصال ومشاكل أسرية، الراجل العاقل هو اللى يجيب مراته وولاده ويفهّمهم الوضع ويقعد يفكر معاهم إزاى يقللوا المصاريف بشكل عام، التظاهر بالقوة والسيطرة مش مفيد لكن الصراحة والمشاركة هى الحل».

المسئولية الاجتماعية التى يشعر بها «عمر» تجاه المجتمع هى السبب فى تقديم تلك النصائح: «الفترة اللى جاية هتكون صعبة على الكل، والأفضل إن الناس تدرك ده وتستعد له بدل ما تصب همها من ضيق الحال على بيوتها وولادها، مش عيب إن الراجل يدوّر على شغل تانى جنب شغله الأساسى، ومش عيب كمان إن الست اللى قاعدة فى البيت تحاول تشتغل أى شغلانة، وإن الأولاد اللى فى الجامعة سواء ولاد أو بنات يحاولوا يشتغلوا عشان يساهموا فى البيت حتى لو بمبلغ بسيط». الدكتور شريف دلاور، الخبير الاقتصادى، أكد أن المصرى بطبعه لديه من الوعى ما يجعله قادراً على التعامل مع الأزمة، فهو «شعب استطاع أن يقهر الظروف أكثر من 7 آلاف عام»، ما يجعله قادراً على تخطى الأزمة الحالية: «ارتفاع الأسعار مستمر منذ فترة طويلة وحتى قبل تعويم الجنيه، القرار فقط جعله أمراً رسمياً، وما سيتأثر به المواطن الآن هو ارتفاع أسعار المواصلات والوقود، وبشكل عام النصائح التى يقدمها البعض بشأن التعامل مع الأزمة، قد تكون أمراً هاماً للبعض ممن لا يزالون تحت تأثير الصدمة، ولكن فى العموم قد تكون أمراً يفعله المصريون بشكل تلقائى».