بورصة الدواجن برعاية «شعبان»: نشرة يومية عن أسعار الفراخ

12:11 ص | الثلاثاء 01 نوفمبر 2016

نشرة عن أسعار الفراخ يقدمها يومياً لأهالى كوم بكار بفيصل، تعتبر هى مؤشر سكان المنطقة لمعرفة أسعار الدواجن بكافة أنواعها، هكذا اعتاد شعبان طه الطيب، صاحب محل دواجن أن يبدأ عمله بتعليق الأسعار التى تتغير بشكل شبه يومى تبعاً لأسعار السوق.

بينما كان «شعبان» يغير لافتة الأسعار من 18 جنيهاً ونصف الجنيه للكيلو إلى 19 ونصف، وقف المارة يتابعون تغير الأسعار ويسألونه: «ليه كده يا عم شعبان؟»، فيرد عليهم: «أعمل إيه دى أسعار النهارده، يمكن بكرة السعر ينزل».

أعلى سعر سجلته نشرة «شعبان»، كان 25 جنيهاً فى رمضان الماضى، وبعدها انخفض السعر إلى 16 جنيهاً ونصف الجنيه، وعن فوائد نشرته لأهالى المنطقة قال: «بتبين للزبون السعر، وآخر الأنباء حتى لو مش هيشترى فراخ، بيبقى عارف الدنيا ماشية إزاى، ولو يوم ما حطتهاش، الناس تقولى ليه مش حاطط نشرة النهارده». الخدمة الإخبارية التى يقدمها يومياً يسميها «بورصة الدواجن 2»، أما الأولى فكان يقدمها فى محله الأول منذ سنوات: «فى المحل القديم أيام ما كانت الفراخ بخمسة ونص كنت بعمل كده، كانت الزيادة 10 صاغ وربع جنيه، دلوقتى الزيادة بالنص والجنيه». لا مجال للفصال، شرط يفرضه «الفرارجى» على زبائنه، فالبيع وفقاً لأسعار بورصته، لا يقل ولا يزيد.