فيديوهات تسخر من «مولد سى هيبتا»: «إحنا ملوك الأفورة»

08:18 م | الأربعاء 27 أبريل 2016

ما إن أعلن أبطال فيلم «هيبتا» موعد عرضه بدور السينما، حتى انتشر على مواقع التواصل الاجتماعى عدد كبير من التعليقات «يلّا بينا ندخل هيبتا».. «مين قال جاى معايا هيبتا».. «أنا بتفرج على هيبتا»، الأمر الذى دفع الشاب العشرينى مصطفى البنا، إلى إطلاق عدد من الفيديوهات للسخرية من ردود فعل المواطنين المبالغ فيه، حسب وصفه، تجاه الفيلم.

«مولد سى هيبتا»، هكذا وصف «البنا» احتفاء الناس بالفيلم الذى حقق 5 ملايين جنيه فى أسبوعه الأول، وهو ما جعله يصنع فيديوهات ساخرة ظهر فيها مرتدياً جلبابه الشهير وهو يتحدث إلى الدمية «سعفان»، قائلاً: «يا عم سعفان، انت مش فاهم الحوار من ساعة الفيلم بتاع هيبتا ما نزل بقى خلاص الفيس بوك كله مقلوب، والسنة الجاية هننزل يوم 20 أبريل نحتفل بمولد سى هيبتا وهنعمله مقام ونمشى فى الشارع نقول له: مدد يا هيبتا مدد».

انتقادات الشاب العشرينى لم تقتصر على الفتيات فقط، بل الشباب أيضاً الذين بالغوا فى نشر صور الفيلم على صفحاتهم: «حتى العيال بقت تكتب يا جماعة أنا رايح هيبتا محدش عاوز منى حاجة؟.. أنا مش عارف هو ليه محسسنى إنه رايح السعودية.. هنعوز منك إيه يا موكوس.. هنقول لك مثلاً والنبى لو لقيت ياسمين الريس جبها معاك وانت راجع مثلاً؟».

سفر «البنا» خارج مصر لم يُتح له مشاهدة الفيلم، فهو لم يسخر من الفيلم بقدر سخريته من رواد مواقع التواصل الاجتماعى، بالإضافة إلى أنه ناقد للعديد من الأحداث من ولاية لاهاى بهولندا، فهو يرى أن المصريين «ملوك الأفورة وبيعملوا من الحبة قبة».