«الناس مابقتش تحب الجرافيتى»

10:21 م | الخميس 15 أكتوبر 2015

اختار أن يعبر عن رأيه بواسطة فن الجرافيتى، هو بالنسبة له أسهل طريقة للتعبير عن رفضه أو تأييده لأى قضية، يرسم ليعرض المشكلة وأحياناً يقدم حلاً، هكذا اعتاد أحمد جابر، الشهير بـ«نيمو»، الذى أخذه الجرافيتى من حياته العملية حيث يدرس فى السنة النهائية فى كلية طب أسنان بجامعة المنصورة.

■ ما علاقة الجرافيتى بالطب؟

- مفيش علاقة، لكن أنا بأحب الاتنين، الفن ده موهبة بأمارسها بعد ما أخلص الجامعة والعيادة، وبأطور نفسى فى فن الجرافيتى بالقراءة والاطلاع على كل ما هو جديد.

■ هل تجد صعوبات أثناء ممارسة هوايتك؟

- آه طبعاً، ناس كتير جداً بتوقفنى تقول لى بتعمل إيه، ناس تقولى مترسمش، وناس مش فاهمة يعنى إيه جرافيتى.

{long_qoute_1}

■ وماذا تفعل حينها؟

- غالباً بأنزل معايا 2 أو 3 من أصحابى، واحد يقف فى أول الشارع، والتانى فى نهايته، عشان يأمن لى المكان من الناس ومن الشرطة، المشاكل بتيجى من الناس أكتر من الشرطة، لكن كلامى مع الناس عليه عامل كبير فى تقبلهم هذا الفن.

■ ما مدى تقبل المجتمع للجراقيتى؟

- أيام ثورة يناير كان فيه تقبل سريع للأفكار الجديدة، غير دلوقتى، أنا مثلاً دلوقتى بأرسم مشروع جديد مسمعتش تعليقات إيجابية إلا قليل جداً، مش كل الناس بقت تتقبل فكرة توصيل الرسائل بطريقة صادمة شوية.

■ هل تعرضت إحدى رسوماتك للتشويه بعد رسمها؟

- كتير، وده بيسعدنى جداً لأنه بيحسسنى إن الجرافيتى ده أثر فى حد والرسالة وصلته، أياً كان تأثيرها عليه.. المهم إنها أثرت.

■ هل فن الجرافيتى مظلوم فى مصر؟

- إلى حد ما مظلوم، ثقافة الجرافيتى الحديث غريبة علينا، إنما الجرافيتى النمطى العادى مشهور فى مصر من زمان، وعدد فنانين الجرافيتى فى القاهرة وإسكندرية أكتر من الأقاليم.

■ لماذا اشتهرت باسم «نيمو»؟

- فى معظم دول العالم الجرافيتى يعتبر من الممنوعات لأننا نستغل الجدران العامة لتوصيل رسائلنا، عشان كده اخترت اسم مستعار أنشر شغلى بيه، ولأن اسم شهرتى «نيمو»؛ اخترت الاسم ده عشان أوقّع بيه شغلى.