صوت الغلابة
صوت الغلابة
بشويش بقى
تعبنا من كتر الشقا
لما اترمينا ع الرصيف
جنب الحوارى الضيقة
فرشنا حسرة قلبنا
وكتمنا صرخة دمعنا
علشان ننام لحظة بقى
بس العذاب مكتوب لنا
والنوم حرام يهنا لنا
لما سمعنا كلام كتير
بس لناس مش زينا
لابسين هدوم متهندمين
رافعين يفط بتهمنا
مكتوب عليها اسمنا
هو الفقير.. علشان فقير
قمنا نفضنا همنا
لما انتبهنا لاسمنا
وجرينا رحنا عندهم
كان الأمل على وشهم
وقالوا ثورة.. وقلنا ثورة
وفرحنا فرحة عمرنا
هنعيش كرام على أرضنا
عدينا كل الممكنات
وحلمنا بكل الأمنيات
ومشينا نهتف كلنا:
عايزين عدالة لمصرنا
وقع شهيد من عندنا
وقع كتير بعد كده
قلنا ضريبة نصرنا
لازم تكون من دمنا
والثورة قامت.. والثورة نامت
ورجعنا نبكى حظنا
ومشينا تانى ع الرصيف
جنب الحوارى الضيقة
لا فيه عمل ولا فيه أمل
بس الغضب مالى العيون
مالى القلوب والأمكنة
بشويش بقى
أخبار متعلقة:
خلاص رُوحى
إنسان
عربة الترحيلات
تشرب لك كاس؟
عودةُ آمون!
بروفايل: معتز الإمام.. الريشة التى توازى القلم
نقطة النهاية
من أسباب البكا
مستقبل الإسلام السياسى
حبيبة بجد
الرسالة
بروفايل: على سطحه الشفاف يتحول «الزجاج المعشق» إلى لوحة فنية
