بريد الوطن .. أمى
صورة تعبيرية
أمى اللى لافة الشمس ف حجابها
شايفاها لسه الحلوة ف شبابها
فاردة دراعها الحضن يجمعنا
ومقسمة لنا الحب وتضحى بمنابها
تغنى ننسى الحزن
ونعيش فى حدوتة
واِن جعنا تعجن حب
فى إيديها بسكوتة
وتصب من عمرها تسقينا عنابها
بإيد تطبطب دلع..
وإيد بتمسح وجع
وإيد فى وقت الجد
بالشدة تخلق جدع
وإيد تشاور بس فتجمّع الغايبين
وتغيب علينا الروح لو ليلة ف غيابها
أمى اللى ضى القمر
طالل على جبينها
وفيها سر الرضا بين ربنا وبينها
والدعوة من قلبها توصل لسابع سما
تفتح لها الأبواب وتعدى حُجّابها
نجلاء نعيم
يتشرف باب «نبض الشارع» باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي bareed.elwatan@elwatannews.com