بريد الوطن.. سكر التموين
بريد الوطن.. سكر التموين
الجسم سارح ف الشوارع حُر
والروح بتنزف وحدة ف الزنازين
والخوف كمين بيقلعك صبرك على الدنيا
وقميصك المدّارى فيه عيوبك
ويفك من عمرك سنين تانية
لتكون مخبى الفرح ف جيوبك
ويجبرك تخفى ابتسامتك قهر ف بطاقتك
وكأن لون الفرح مش منك وفوق طاقتك
ولو ابتسمت ف وش الدنيا تتعفّر
والخوف يزن ف لحظة ويصفّر
ويفتشوك تانى.. ويقلعوك تانى
يا سكر التموين
نجلاء نعيم
يتشرف باب «نبض الشارع» باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي bareed.elwatan@elwatannews.com
