ليلى علوي عن «ماما حامل»: اللي هتشوفه هتتمنى تتجوز واحد زي بيومي فؤاد

كشفت الفنانة ليلى علوي كواليس تصويرها فيلم «ماما حامل»، من بطولتها مع الفنان بيومي فؤاد، حيث ظهرت في الفيلم وهي زوجة بيومي فؤاد، وأم حمدي المرغني ومحمد سالم، «ليه لأ ماكونش مرات بيومي فؤاد في الفيلم، هي فيه واحدة ست تلاقي راجل بالرومانسية دي والدلع ده، وتقول لأ، أي حد هيتفرج على الفيلم، هيقول نفسي يبقى جوزي زي بيومي فؤاد، مش مشكلة الشكل، المهم بيهتم بيها إزاي، ويدلعها إزاي».

وأضافت ليلى علوي، خلال تصريحات خلال ندوة «الوطن»، أن نجلها أصغر من محمد سالم وحمدي الميرغني ليس بكثير، «أنا أول ما قرأت السيناريو على طول انبسطت وأنا بقراه، لاقيت إني مش متوقعة أعمل فيلم زي ده أو أشوف فيلم زي ده، لذلك حبيت إني أعمله بعدما تحدثت مع المخرج محمود كريم، خاصة بعد ما عرفت مين الكاست بقيت متشجعة أكثر لهذا العمل، فأنا بقول أنا راجعة بحاجة حلوة اجتماعية بطريقة كوميدية».

وأردفت الفنانة ليلى علوي أن عملها في فيلم «ماما حامل» مختلف عن أي عمل قدمته قبل ذلك، كما أنها توقعت أن يكون الفيلم لذيذا ويعجب الكثيرين، لكن لم تتوقع هذا الكم الكبير من المعجبين بهذا الفيلم، «واحنا بنصور المخرج واللي بيشوف المونتاج، صورنا ووقفنا كتير، عشان ظروف كورونا وأخرى، قالوا الفيلم لذيذ جدًا، رغم إني مشفتهوش قبل ما يتعرض، واتفرجت عليه كان يوم جمعة حفلة الساعة 11 عشان تبقى الدنيا فاضية والحمد لله مكنتش فاضية».

وأوضحت أن الفيلم كان به رسالة، وتم عمله بطريقة لذيذة، «كلنا نعاني من أننا قاعدين في بيت واحد مفيش حوار بينا، كل واحد قاعد في حتة بتاعته حتى لو بنتقابل في السفرة كل واحد في تليفونه ولازم يشيل السماعة عشان نسمع بعض، دي حالة مش لذيذة العالم كله فيها، لأن المصريين دافيين أوي وبنحب الاحضان والكلام، مبقاش فيه ده، الفيلم فيه رسالة للأسرة وفيه رسالة للشباب وفي نفس الوقت بطريقة لطيفة ولذيذة».

• ليلى علوي
• ماما حامل
• بيومي فؤاد
• محمد سالم
• حمدي المرغني
• ليلى علوي
• ماما حامل
• بيومي فؤاد
• محمد سالم
• حمدي المرغني