14 تصريحا لوزيرة التضامن عن مبادرة «حياة كريمة»: تكلفته تتخطى 700 مليار

حلت الدكتورة نيفين القباج وزيرة التضامن الاجتماعي ضيفة على الإعلامي شريف عامر عبر تطبيق «زووم» وذلك في برنامج «يحدث في مصر» المذاع عبر فضائية «mbc مصر» وتحدثت خلال اللقاء عن مبادرة حياة كريمة وجهود وزارة التضامن لتحسين جودة حياة المواطنين.

وأبرز تصريحات وزيرة التضامن نرصدها لكم كما يلي:

1- مبادرات دعم المواطن بدأت منذ عام 2015 في تحسين منظومة الدعم النقدي «تكافل وكرامة» ويليها تحسين منظومة الخدمات الصحية والخدمات في المستشفيات وتحسين جودة التعليم.

2- كان فيه عملية ممنهجة من الإصلاح، مش بس الإصلاح الاقتصادي لكن التنموي أيضا في عدة مجالات، زي التحول الرقمي، وكان فيه عملية تنمية متكاملة شاملة بتكمل بعضها البعض وبيراعى فيها قواعد العدالة الاجتماعية، وأن الدولة كلها بتشتغل على كافة الفئات مش بس الفئات المتوسطة أو تحت المتوسطة لكن غير القادرين.

3- أطلقنا في الوقت الحالي أكبر برنامج قومي على مستوى جمهورية مصر العربية وعلى مستوى دول كثيرة.

4- من أول سنة 2015 وفيه سلسلة من البرامج القومية اللي معنية بشكل مباشر بالمواطن المصري وبجودة حياته والحياة الكريمة وكرامته، بدأ من برنامج تكافل وكرامة وبدايات الإصلاح الاقتصادي، ثم بعد كده إصلاح المنظومة الصحية وجودة التعليم وشبكة الاتصالات وشبكة المواصلات، وهي حلقة من التنمية الممنهجة اللي استهدفت الوطن والمواطن، لكن بنختمها في الوقت الحالي ببرنامج حياة كريمة وهو أكبر برنامج قومي على مستوى جمهورية مصر العربية مش بس في تكلفته اللي بتتخطى تقريبا 700 مليار، لكن فيه أكتر من 12 وزارة بتشتغل فيه ولأول مرة الدولة كلها بتدخل الريف المصري بمنظور تنمية شامل، كهرباء وصرف صحي ومياه ومواصلات واتصالات وسكن كريم للمواطن.

5- كنا في المرحلة الأولى لحياة كريمة وصلنا لأكتر من 114 ألف أسرة في مبادرات سكن كريم، ودخلنا لأكتر من حوالي 280 ألف أسرة بمبادرات صحية، وكمان كان عندنا جزء من إصلاح منظومة التعليم المجتمعي والحضانات.

6- داخلين في الجولة التانية بنفس التدخلات وكمان مزودين عليها حاجات خاصة بالحضانات، ويمكن في الأونة الأخيرة كان فيه اهتمام كبير بالحضانات وتنمية الطفولة المبكرة وأننا بنؤمن إن التنمية بتبدأ من الطفولة وبتبدأ من التعليم، واحنا مهتمين جدا بالطفولة المبكرة حتى 4 سنين.

7- الرئيس السيسي وجه بإننا نفتح ما يقرب من 5000 حضانة زيادة على الأقل في المرحلة التانية.

8- حاليًا إحنا عندنا أكتر من 5000 رائدة ريفية وشاب متطوع، والرئيس وجه أن الرائدات الريفيات يوصلوا لـ10 آلاف رائدة وبنزود عليهم 10 آلاف متطوع من برنامج تكافل وكرامة، ومعانا أكتر من 3000 جمعية مش بس الجمعيات الكبيرة لكن جمعيات الوسط وجمعيات تنمية المجتمع القريبة من الناس والأكثر تأثيرا فيهم، ومعانا رجال الدين الإسلامي والمسيحي لأن المجتمع القروي وثقافته بتتأثر جدا بالثقافة وبالحوار الديني. 

9- عندنا كمان جزء كبير من القطاع الخاص اللي تطوع معانا بأجهزة تعويضية لذوي الإعاقة، وفي ميكنة خدماتنا في القرى، وفي توفير فرص تمكين اقتصادي للسيدات، والمساعدة في تمويل بعض التدخلات الموجودة في حياة كريمة.

10- إجمالي اللي بياخدوا دعم نقدي منتظم شهريا 3.7 مليون أسرة عددهم ما يقرب من  14.3 مليون مواطن.

11- عندنا 77 ألف أسرة بياخدوا دعم نقدي على فترات متقطعة من العام، منهم الحوامل والمرضعات، يعني بياخدوا دعم نقدي كل 3 شهور ودول من الأسر الفقيرة لكن أفضل حالة من الـ3.7 مليون أسرة.

12- بنتعاون مع وزارة التموين عشان نوفر لتلك الأسر بطاقات تموين ودعم خبز، ومع وزارة الصحة عشان نوفر لهم تأمين صحي، وكل لما نعلى كل لما تبقى التدخلات أقل، وممكن الطبقة اللي بعدها تاخد تموين وتاخد دعم صحي وتاخد أقل في الدعم النقدي.

13- بنراقب خرائط الفقر الصادرة عن الجهاز المركزي للتعبئة العامة والاحصاء، وبنشوف مين المحافظات أكتر فقرا، وبنشوف مين الفئات زي المرأة المعيلة والمسنين وذوي الإعاقة والعمالة غير المنتظمة والفئات اللي بتعاني بشكل موسمي زي الصيادين.

14- المواطن هو الهدف بتاعنا والمنتهى بتاعنا واللي عاوزين له حياة كريمة.

• التضامن
• نيفين القباج
• حياة كريمة
• يحدث في مصر
• مبادرة حياة كريمة
• التضامن
• نيفين القباج
• حياة كريمة
• يحدث في مصر
• مبادرة حياة كريمة