«حجرين شيشة بـ400 جنيه».. قهوة بلدي في كفر الشيخ بأسعار فندق 5 نجوم

06:11 م | الثلاثاء 27 أبريل 2021

«شاي نعناع بـ35 جنيها.. مياه معدنية صغيرة بـ15 جنيها.. حجر شيشة بـ200 جنيه»، قائمة أسعار قهوة بلدي داخل محافظة كفر الشيخ، قررت أن ترفع الأسعار أمام الزبائن، مستغلين التجمعات بين الشباب على المقاهي في رمضان، وفي الوقت نفسه تقدم شيشة على الرغم من منعها ضمن الاجراءات الاحترازية لمواجهة كورونا.

أحمد إبراهيم ، أحد السكان، يقول إن الأسعار عادةً داخل المقاهي الشعبية تكون بسيطة تناسب قعدات الشباب اليومية، وتفاجئ بهذه الأسعار: «إحنا كنا 4 صحاب ورايحين نقعد على القهوة طلبنا شاي وقهوة تركي ومياه واتفاجئنا أن الحساب وصل لـ830 جنيه ومش متخيلين إن الأسعار بقيت مولعة كده ولا معرفش هي دي القهوة الوحيدة اللي بتعمل كده ولا لأ.. أصل دي قهوة آخرنا قوي لما الحساب يتقل يبقى 20 جنيه ولا 25 جنيه بس، لكن ده صعب جدا».

ورغم أن «أحمد» لم يمرر الموقف، وصمم على أن يتحدث إلى صاحب المقهي: «قولت له إيه الأسعار دي كلها دي قهوة بلدي.. قالي عشان ده جو رمضان وكل حاجة فيه بتختلف تماما عشان الخيمة الرمضانية اللي احنا عاملينها».

ونشر أصدقاؤه صورة من ورقة الحساب المدفوع، الذي وصل إلى 830 جنيها، وتداولها رواد السوشيال ميديا، وسخروا من هذه الورقة كثيرة، ومن هذه التعليقات: «هو الحساب ده في الفورسيزون ولا إيه مش معقول تكون دي قهوة بلدي مش معقول إيه الأسعار دي».

نفس الموقف تكرر مع كمال سالم، داخل إحدى المقاهي الشعبية، داخل المنطقة الأزهرية بمحافظة كفر الشيخ، وأكد أن الأسعار كانت مرتفعة جدا، ووصل الحساب المدفوع إلى 250 جنيها: «احنا طلبنا الحاجات العادية اللي بنطلبها على طول، ودي كانت قهوة جديدة، قولنا نروح نجرب، وطلبنا فعلا عصير مانجا وبيبسي وشاي ونعناع بلمون سخن وبارد، وفي الآخر قومنا نحاسب ادبسنا في 250 جنيه، وتوبة نروح هناك تاني في رمضان، دا احنا نقعد فوق السطح ولا على قهوة في رمضان».