«بيتر وآدم» شقيقان يسيران على خطى تامر حسني وأحمد حلمي: عايزين نشتهر

10:42 ص | الاثنين 05 أبريل 2021

بيتر وآدم سعيد نعيم، شقيقان يحلمان نفس الحلم ولهما نفس الهدف، يجتهدان منذ الصغر لتحقيق حلمهما، يحملان رسالة للجميع بعنوان «لا لليأس».

يبلغ «بيتر» من العمر 8 سنوات وهو الأخ الأصغر الذي بدأ مشواره في التمثيل منذ عمر عامين: «أنا بيتر سعيد عندي 8 سنين، ابتديت أمثل من وأنا عندي سنتين، صورت حاجات كتير قوي، إعلانات ومسلسلات، منها حاجات كنت بسهر فيها بالأيام ومش بنام، مثلت مع الفنانة منة فضالي في مسلسل قيد عائلي، كنت طالع بدور ابنها في المسلسل، وعملت إعلانات كتير زي إعلان لصالح مؤسسة مجدي يعقوب وإعلانات اطلب وشاركت في إعلان عن المعهد القومي للأورام وغيرهم كتير».

الآن يعمل «بيتر» مع الفنان يوسف الشريف في مسلسله الجديد «كوفيد 25» الذي سيعرض في النصف الثاني من شهر رمضان: «حابب أقول حاجة لكل الناس، اتعبوا وكملوا في شغلكم واعملوا الحاجة اللي بتحبوها عشان توصلوا لحلمكم وهدفكم، أنا صورت كتير وتعبت كتير، نزلت البحر في الشتا ولبست شتوي في الصيف ولبست صيفي في الشتا لزوم التصوير، كل ده عشان أوصل لحلمي وهدفي، ودايما ببعد اليأس عن تفكيري».

الشقيق الأكبر لـ«بيتر» هو «آدم» الذي يبلغ من العمر 9 سنوات، ولديه نفس الأحلام والأهداف، يحكي «آدم»: «مثلت مسلسلات وإعلانات كتير زى مسلسل هوجن، وكمان شاركت في مسلسل نمرة اتنين مع الفنان ماجد الكدواني».

بجانب التمثيل يهوى «آدم» لعب كرة القدم والتنس والسباحة والرسم: «نفسي لما أكبر أبقى لاعب كرة زي محمد صلاح ونفسي كمان أقابل الفنان تامر حسني وأمثل معاه لأني بعتبره مثل أعلى ليا وبسعى إنى أبقى زي تامر حسني بالظبط، أبقى مشهور ومحبوب من كل الناس، ومهما بتعب في التصوير مش بيأس ولا بتخلى عن حلمي».

يتشارك الشقيقان في نفس المواهب والأحلام، ويقول «بيتر»: «زى أخويا آدم بلعب كرة قدم وتنس وسباحة وبحب أرسم وألون، ونفسي لما أكبر أبقى ممثل مشهور أو لاعب كرة، وأكتر فنانين بحبهم هما أحمد حلمي ومحمد رمضان اللي نفسي أبقى زيهم لما أكبر».

تشارك الشقيقان في أكثر من جلسة تصوير عن الوحدة الوطنية، وتقول والدتهما: «بحب أزرع فيهم حب الوطن وإفادة الناس، شاركوا في سيشن في بداية وباء كورونا عن دور الجيش والشرطة والأطباء في مكافحة الوباء، بيتر قام بدور ظابط شرطة وآدم عمل دور ظابط جيش، وشاركوا كمان في سيشن تانية عن الوحدة الوطنية في شهر رمضان اللي فات، عمل آدم دور شماس وبيتر كان مسحراتي».