أمير طعيمة عن أغنية «أنا مصر»: كلماتها من القلب.. و«منير» مغيرش حرف
أمير طعيمة عن أغنية «أنا مصر»: كلماتها من القلب.. و«منير» مغيرش حرف
كشف الشاعر أمير طعيمة، كواليس أغنية «أنا مصر»، للمطرب الكبير محمد منير، خلال فعاليات موكب نقل المومياوات الملكية من المتحف المصري بالتحرير للمتحف القومي للحضارة المصرية بالفسطاط، قائلا: «في يوم زي كده لازم كلنا نفتخر ببلدنا وتاريخنا، وأنا مبسوط النهاردة لأن الناس السوشيال ميديا بتنشر كلمات الأغنية (أنا مصر من غيري ميزان الدنيا دي يختل)، والهدف اتحقق أكتر من اللي كنت بحلم به».
وعن ردود الأفعال حول الأغنية علق «طعيمة»، خلال اتصال هاتفي ببرنامج «التاسعة»، المذاع على شاشة التلفزيون المصري، «أنا في العادي ببقى بارد، بس في الإيفنت ده كنت متوتر جدا قبله، ومحاولتش اتخيل أقيس مع نفسي هيبقى رد الفعل إزاي، لأن الموضوع كبير ومسؤولية، خاصة فيه 400 قناة بتنقل الحدث، بس الحمد لله رد الفعل فرح الواحد جدا».
وتابع: «كل الناس اللي اشتغلت في الإيفنت خدت منهم وقت، شغالين فيه أكتر من سنة، واتعرف من بداية 2019، واتعمل فيه مجهود فظيع من كل الناس، وكل واحد عمل اللي عليه في الجزء الخاص به».
وواصل: «الكلمات كانت طالعة من القلب، وكنا عملنا أكتر من أغنية، ولو كان الحدث اتعمل من 6 شهور مكنتش موجودة، كان فيه أغنية تانية، ولما قولت كلمات الأغنية للكينج محمد منير مطلبش حرف يتغير فيها، واشتغلنا علطول وعجبته جدا من أول مرة».
وأردف: «حسيت أن الأغنية دي هتكون أكثر واقعية لأن الأغنية مش بتتكلم على لسان مصر لكن مصر بتتكلم على لسان نفسها، والحدث ده يستاهل يتقدم بالشكل ده، ولو مش هنفخر بالتاريخ الكبير ده هنفخر بإيه».
وتقول بعض كلمات الأغنية: «أنا اللي لا عمري يوم كليت ولا مليت أنا اللي في وش زمني وقفت ولا اتهزيت، أنا الفكرة اللى عايشة سنين أنا الموضوع أنا الصوت اللي وقت الصمت كان مسموع».
