عمرو أديب عن تلويث ترعة العزيزية: ريحة زي الزفت واصلة للشاشة عندي
عمرو أديب عن تلويث ترعة العزيزية: ريحة زي الزفت واصلة للشاشة عندي
استنكر الإعلامي عمرو أديب، تلويث ترعة العزيزية بمحافظة الجيزة بعدما قامت الدولة المصرية بتبطينها، قائلًا: «اللي بيرمي الزبالة بيبوظ حياته، وبيبوظ أكل عياله، بيجيب لنفسه ذباب وأمراض وميكروبات، وريحة زي الزفت وزي القرف.. الريحة واصلة للشاشة عندي».
وأضاف أديب، خلال تقديم حلقة اليوم من برنامج «الحكاية»، الذي يعرض عبر شاشة «MBC مصر»: «المحافظون يجب أن يعملوا بشكل أكبر في هذا الأمر، وأن يساعدوا الناس على إيجاد طريقة للتخلص من القمامة.. ده انتحار، ايه اللي بنعمله في نفسنا ده؟! مفيش بلد في العالم فيها حد بيعمل الكلام ده، محدش بيسد مجاري المياه غيرنا».
وتابع: «ولما الدولة تيجي تتكلم، يقولوا حرام عليك اتهرينا فلوس محدش يقرب لنا.. طب المفروض مترميش زبالة في المياه، ومينفعش نضع كاميرات مراقبة، مش هينفع نستخدم كاميرا لكل مواطن، ما تاخدوا بالكم من بلدكم وحياتكم، وكل واحد يمشي ويبص ويقول إيه القرف ده، الكلام ده مش جاي من بلد تانية».
وأردف: «المناظر دي لازم تخلص ويحصل ترقي حضاري، قعدنا 10 سنين بنصوت من المناظر دي، لأن الترعة دي من الطرق المؤدية إلى الهرم وبالتالي فإن هذا الأمر مضر صحيا واقتصاديا وسياحيا وبيئيا ودينيا وجماليا، فيه ناس دفعت ملايين عشان يسكنوا هناك، ليه تقعدوا في حتة وحشة.. إنتو متهمين، الريحة واصلة للشاشة، وهذا الامر ليس في الجيزة فقط، وكل محافظة هنلاقي فيها المنظر ده».
وحول مشروع تبطين الترع، قال أديب: «ولا له لازمة، وقف المشروع ده، وحط الفلوس في حاجة تانية تنفع، الناس مش مقدرينه صح ومش فاهمين إيه الحكاية، نوصل المياه بطريقة تانية».
