أول قاموس عربي إسباني لمصطلحات كرة القدم بتصاميم مصرية
أول قاموس عربي إسباني لمصطلحات كرة القدم بتصاميم مصرية
قاموس خاص بمصطلحات كرة القدم، هو نتاج تعاون مشترك بين الدوري الإسباني «الليجا» والسفارة الإسبانية ومعهد ثربانتس بالقاهرة.. مصدر فخر واعتزاز لـ«زينب علي» خريجة كلية آداب جامعة عين شمس قسم لغات شرقية تخصص لغة أردية البالغة من العمر 29 عاما.
«ساعد نفسك بنفسك» شعار رفعته «زينب» بعد التخرج: «كان نفسي أدخل فنون جميلة بس مجموعي في الثانوية العامة كان أقل فدخلت كلية آداب واتخرجت منها متخصصة في اللغة الأردية، ولأني كنت بحب الرسم بدأت في آخر سنة في الكلية أتعلم فوتوشوب وأدخل مجال الجرافيك، بجانب دراستي للغة الأردية بشكل أكبر في المركز الثقافي الهندي».
رحلة الترجمة إلى اللغة الأردية
تحكي «زينب» أنها بعد التخرج بحثت عن فرصة عمل في مجال دراستتها ومجال الجرافيك: «كنت بطلب من الناس يدربوني من غير مقابل بس محدش كان بيرضى يساعدني، فاشتغلت مدرسة رسم فترة لحد ما جاتلي فرصة أشتغل في مجال الجرافيك في شركة مجالها مختلف، وكانوا طالبين إجادة اللغة الانجليزية، وكمان النصيب أراد أن تبدأ رحلتي في عالم الترجمة الأردية، فكنت مسئولة عن كل ما يخص التوثيق بالسفارة زي شهادات الميلاد والزواج والوصايا وغيره».
قابلت «زينب» أشخاص كسروا من عزيمتها: «محدش ما بيساعدني وبيقدم لي معلومة كاملة، فقررت أعتمد على نفسي؛ كنت بسمع كلام يهز ثقتي في نفسي بس لأني واثقة في ربنا عافرت والحمد لله ربنا رزقني بصديقة اسمها شيماء مجدي ساعدتني كتير في مجال الجرافيك، وكمان دخلتني مجال الماركتنج، كنت مسئولة فترة عن برج القاهرة من سوشيال ميديا وايفنتات واشتغلت مع براندات كتير جوة وبرة مصر».
البداية من جروب «الحريفة»
تواجدها على جروب «الحريفة» وهو جروب خاص بالعمل الحر أتاح لها فرص عمل كثيرة في مجال الجرافيك حيث تقول: «من خلاله عرفت فرصة تصميم القاموس بس كنت خايفة لأن مكنش ليا في كرة القدم لكن شجعتني صاحبتي شيماء ومستر خوان ممثل الاتحاد الإسباني في مصر وكمان رشحتني إسراء طه أحد مسئولي جروب الحريفة، كنت قدام تحديين، هما التعامل مع مستر خوان بالانجليزية، ورسم شخصيات القاموس، والحمد لله قدرت أكون أد التحدي رغم ترددي لأني حسيت الموضوع كبير عليا بس الحمد لله عجبهم شغلي؛ كنت بشتغل على القاموس بعد ما برجع من شغلي، كنت بشتغل عليه 6 ساعات يوميا لأني كنت بعمل أبحاث وجبت صور حقيقية أخد منها الأشكال والوضعيات الرياضية لكرة القدم».
وتكمل «زينب»: «القاموس شغله مش سهل خصوصا أن فيه 3 جهات بتراجعه وتعدل عليه، فكل حد كان بيطلع تعديلات مختلفة، اشتغلت على مشروع القاموس من أواخر شهر نوفمبر اللي فات لحد ما تم تسليمه في تاني أسبوع من شهر فبراير».
دعا مستر خوان «زينب» لحضور مؤتمر لتكريمها وقد حضر المؤتمر وزير الشباب والرياضة والسفير الأسباني: «أعطاني مستر خوان وسام شكر على أني مصرية ولتصميمي للقاموس».
تحلم «زينب» بمساعدة الناس: «محدش بياخد رزق حد ونفسي أساعد أي حد حابب يتعلم جرافيك أو ماركتينج عشان كدة عملت قناة على اليوتيوب بعلم فيها الجرافيك، وبدي نصايح عن سوق العمل والعمل الحر، بحلم أن يكون ليا مشروعي الخاص وإني أنشر أول كتاب كتبته؛ وفي الآخر حابة أقول إن مش شرط تبقى خريج كلية فنون جميلة أو تطبيقية عشان تنجح مؤمنة بمقولة إنك تشتغل الحاجة عن هواية مش معناها أنك مش حريف».
