العزف عن بُعد: تحدي الفيروس بمقطوعات «الكلارينت والهارب»
العزف عن بُعد: تحدي الفيروس بمقطوعات «الكلارينت والهارب»
الموسيقى تعطى روحاً للكون وأجنحة للعقل ليحلّق فى الخيال، ولم يسلم عازفوها من تداعيات جائحة «كورونا»، ومن بينهم الدكتورة ريهام حجاج، خريجة أكاديمية الفنون الكونسرفتوار وعازفة كلارينت فى أوركسترا النفخ الهارمونى فى شفاينفورت فى ألمانيا، حيث اضطرت إلى العزف منفردة فى منزلها.
تعيش «ريهام» فى ألمانيا مع زوجها المهندس «توماس» وطفليهما «إليسا» و«يونس»، وخطرت ببالها فكرة: «لما لقيت نفسى غير قادرة على العزف فى أى مكان، ابتديت أعزف مع نفسى فى البيت، ولقيت الدكتورة أميرة حامد، عازفة الهارب فى أوركسترا أوبرا القاهرة، بتعزف لوحدها برضو أو مع بعض الزملاء، ففكرنا نعمل حاجة جديدة مع بعض، ونعزف مزيكا عن بُعد، مزيكا لها كاريزما مختلفة، وكونا فريق صغير سميناه كاريزما، الدكتورة أميرة تعزف لوحدها الجزء الخاص بها، وأنا أسجل عليها أو العكس، وبالفعل نزلنا كذا فيديو على صفحاتنا على الفيس بوك».
الموسيقى أبجدية أخرى للمشاعر تعجز عن وصفها الكلمات والحروف، بحسب «ريهام»: «كان لازم نختار مزيكا مناسبة للغناء مع الهارب، وكنا بنسجل أكتر من مرة علشان نظبط الصوت، كأننا فى غرفة واحدة، والكاريزما بتاعتى إنى أغنى أو ألقى شعر مع العزف، أما أميرة فالكاريزما بتاعتها فى العزف والتوزيع ولها دور كبير فى اختيار الأعمال المناسبة، وبإذن الله لما أنزل القاهرة، هنعزف أعمالنا بشكل أوسع، ونتمنى نستضيف زملاء لهم كاريزما تضيف لفكرتنا أكتر».
«الجيش قالك اتصرف»، هكذا عبرت «ريهام» عن فكرتها: «إحساس إن إحنا بُعاد عن بعض، خاصة أنا، لأن القيود عندنا فى ألمانيا أكتر، خلانى عاوزة أعمل حاجة علشان أعزف تانى مع زملائى عِشرة العمر وأتمنى إن الفكرة تنجح».
وتختم «ريهام» كلامها بقولها: «المزيكا لا يمكن تتحبس بسبب الكورونا أو لأى سبب تانى، وإحنا اتصرفنا وحاربنا القيود والعزل».
