حقيقة سحل كلب في الشارع أمام أحد المطاعم الشهيرة: عض طفل

11:01 ص | الثلاثاء 19 يناير 2021

مقطع فيديو صادم تداوله رواد مواقع التواصل الاجتماعي، لشخص يجر وارئه كلبا، ويسحله بقوة في الشارع، دون رحمة أو شفقة، ليتجمع المارة في ذهول واستياء محاولين إيقاف تصرفه البشع، حفاظا على حياة الروح التي لا تتكلم ولا تعرف كيف تعبر عن آلامها.

التقط الفيديو، أمام أحد مطاعم المشويات الشهيرة، وزعم رواد السوشيال ميديا، أن الشخص الذي سحل الكلب المسكين، أحد العاملين بالمطعم، وأن الحيوان لم يكن يريد سوى الطعام فقط، إذ نشر تعليق مع الفيديو: «مطعم صبحي كابر بيعذب كلب عشان واقف وجعان، سحل الكلب، وضربه بالعصيان، الكلب غلبان جدا».

وتوالت التعليقات التي استنكرت هذه الفعلة الدنيئة، منها: «حسبنا الله ونعم الوكيل فى القلوب الجاحدة ديه»، و«الناس واقفين يتفرجوا الرحمة فين يا خلق»، «لازم يكون فيه قانون وعقاب للناس القاسية قلوبهم»، «حسبى الله ونعم الوكيل، ربنا ينتقم منهم، ويعود عليهم بالخراب إن شاء الله».

وكتبت نهى جاد، إحدى مستخدمي «فيسبوك»: «وهو لو الكلب مش غلبان كان سكتله، حقه عند ربنا، منه لله علشان بيقولوا كلاب الشوارع مسعورة»، وعلقت بسنت وفيق: «محدش زعقله ليه ووقفه عن اللي بيعمله؟ بيتفرجوا ويصوروا وخلاص؟».

المطعم يرد على فيديو سحل الكلب

عبارات الاستياء والانتقادات العنيفة، دفعت الصفحة الرسمية لمطعم صبحي كابر، على «فيسبوك» إلى الرد، مشيرة إلى أن الفيديو المتداول قديم، وحدث في الصيف، ودللت بأن الأشخاص الذين ظهروا في المقطع، يرتدون ملابس صيفية، مؤكدة أن الرجل الذي سحل الكلب لا صلة له بالمطعم، وليس أحد العاملين به، وهم ليسوا مسئولين عما يحدث في الشارع.

ونشرت الصفحة الرسمية، بيان على لسان الشيف صبحي كابر: «السلام عليكم جميعا، في الحقيقة أنا قررت أرد بمنشور بناء على طلب عملائي إللي بيحبونى، وبيثقوا فيا بيقولوا لي معمول ضدك حملة، والناس زعلانة، فأنا قررت أوضح للجميع، إن الحوار ده من أكتر من سنة، والدليل على كده إن الناس لابسة صيفي، ومفيش كمامات، وأنا نفسي وقتها اتفاجئت باللي حصل عشان اللي عمل كده أصلا مش من الاستاف عندى، لأنهم كلهم لابسين يونيفورم المطعم».

وتابع: «وعرفت إن الشخص ده عمل كده لما كلب عض طفل، وأكيد أنا مش هسمح لحد من اللي بيشتغلوا معايا أنه يعمل كده، في الأول والأخر دى روح، وكمان عرفت أن أحد مديري الصالة تشابك مع الشخص ده، بسبب اللي عمله، وللأسف أنا مقدرش أحاسب حد في الشارع على حاجة هو عملها لمجرد إنه كان موجود قدام مطعمى، وشكرا ليكم ولاهتماكم والسلام عليكم ورحمة الله وبركاته».