مصور فيديو بائع الفريسكا يكشف كواليسه
مصور فيديو بائع الفريسكا يكشف كواليسه
كشف الدكتور حاتم خاطر، كواليس تصويره فيديو "إبراهيم" المشهور بـ "بائع الفريسكا"، قائلا: "احنا كنا في الساحل الشمالي، كنت رايح أزور صديق ليا في القرية دي، فلقيت ولد جميل، حاطط على صدره صندوق الفريسكا، أنا بحب الجدعان وبشوف فيهم الأمل لأنهم عارفين قيمة العمل".
وأضاف "خاطر"، خلال اتصال هاتفي ببرنامج "مساء DMC"، المذاع على شاشة قناة "DMC"، وتقدمه الإعلامية إيمان الحصري، أنه تحدث مع "إبراهيم"، وسألته عن دراسته فرد عليه أنه حصل على 99.7% في الثانوية العامة وسيدخل كلية الطب البشري، "أنا كان في نيتي أنفع الولد اللي رايح جاي في الشمس، لقيت حدوتة أكبر من أني بنفعه، لقيت قصة نجاح، فقلت أعمله تقدير للقصة اللي بسمعها، عشان الولد يحس إن فيه ناس مهتمة".
وتابع: "الولد قال كلام خبط في قلبي، لما قال (كفاية إني أشوف أبويا مبسوط)، وبعدين سألته أنت عاوز تتخصص في إيه؟ راح قال لي في الجراحة العامة، قلت له للدرجة دي محدد؟، فقالي هو احنا هنلعب !".
وواصل: "أنا بقيت منبهر بالولد ده، وهو ده شباب مصر الجدعان، والفيديو عدى 2 مليون مشاهدة على تويتر لوحده، كان تريند، ودي رسالة مهمة لازم نقف عندها وهي قوة السوشيال ميديا واللي حصل مع إبراهيم وقفة جديدة".
