الطلاب والمغتربون.. سكان جدد يغيرون طبيعة "وسط البلد"
الطلاب والمغتربون.. سكان جدد يغيرون طبيعة "وسط البلد"
مبانٍ عريقة ذات طراز معمارى فخم، تبدو كقطعة من أوروبا، يسكنها أناس لهم طبيعة خاصة، اعتادوا على السكن فى منطقة وسط البلد حيث الهدوء والرقى، ولكن بمرور الزمن تغيرت معالم المنطقة، تحولت إلى مول تجارى، عقارات مزينة بنقوش تراثية أسفلها محلات تجارية بأسماء أجنبية، حتى السكان أنفسهم تغيروا، معظم القدامى اتجه إلى المدن الجديدة باحثاً عن الهدوء والطبيعة الصافية، فيما بقيت بعض الشقق السكنية مأوى للمغتربين العاملين فى القاهرة.
أحمد طه، أحد سكان شارع النيل، بوسط البلد، هو واحد من السكان القدامى، يسكن منذ أكثر من 40 عاماً، مساحة شقته لا تتعدى الـ100 متر، بإيجار 100 جنيه شهرياً: «أنا ساكن فى وسط البلد من أيام ما كان كلها أجانب، وكلنا كسكان عارفين بعض، لكن معظم الشقق دلوقتى بقت لشركات ومصانع ومحلات ومخازن للأقمشة، والعمال طالعين ونازلين على السلالم وبقت زى العمارات العشوائية».
إزعاج شديد يشعر به «طه» وغيره من السكان: «على طول فى خناقات بين العمال جوه العمارة، وده بيسبب لنا حالة نفسية سيئة، إحنا متعودين على الهدوء»، مؤكداً أن «معظم السكان القدامى تركوها ورحلوا إلى المدن الجديدة».
يعتبر نفسه من السكان الجدد لمنطقة وسط البلد، استأجر طاهر دربالة، موظف مغترب، شقة متواضعة فى الدور الأخير بدون مصعد كهربائى فى ميدان لاظوغلى، بإيجار 1500 جنيه شهرياً: «العمارة نصها سكان عايشين فيها من زمان، والنص التانى زيى حالاتى مغتربين، وللأسف كنت فاكر زى مشاهد التليفزيون هلاقى الجيران عايشين أسرة واحدة، بس لقيت كل واحد قافل باب بيته عليه، والشوارع زحمة جداً والمحلات والقهاوى كتير قوى»، بحسب «طاهر»، الذى يشعر بمعاناة من السكن فى منطقة مزدحمة: «جمال وسط البلد راح وبقت كلها محلات تجارية وشقق إيجار جديد».
«كل منطقة ولها تسعيرة وكل ما كانت الشقة مفروشة السعر بيزيد ودلوقتى 70% من السكان مغتربين يا إما أصحاب شركات»، بحسب وليد رمضان، سمسار عقارات، موضحاً تسعيرة الإيجارات فى وسط البلد: «الشقة غرفتين وصالة بدون أثاث إيجارها 5000 جنيه شهرياً، فى منطقتى سعد زغلول وقصر العينى، أما منطقة عابدين فيتراوح الإيجار بين 2000 و3000 جنيه وفقاً لموقعها، فكلما كانت فى شوارع جانبية انخفض سعرها: «الشقق اللى بتكون بعفش إيجارها 10 آلاف وممكن أكتر من شخص يأجروها مع بعض، وشقق بمساحة 200 متر إيجارها بـ 25 ألف ودى أغلبها شركات»، لافتاً إلى أن المنطقة تحولت إلى تجارية.
