سيارة وسفر ودبح عجل.. هدايا أولياء الأمور لطلاب الثانوية العامة
سيارة وسفر ودبح عجل.. هدايا أولياء الأمور لطلاب الثانوية العامة
«سفر، سيارة جديدة، تليفون، ذبح عجل وجدى»، أبرز المكافآت التى قدمها أولياء الأمور لأبنائهم احتفالاً بنجاحهم فى الثانوية العامة، وذلك عقب ساعات من إعلان النتيجة أمس.
محمد عثمان، مدرس فيزياء، فى مدينة العبور، قرر التعبير عن فرحته بنجاح نجله «أحمد»، وحصوله على 90% فى الثانوية العامة، بذبح عجل والتجهيز لمائدة طعام تضم أصنافاً متعددة من الأكلات ومنها الفتة واللحمة والكفتة، لإطعام أهله وأصدقائه وكذلك توزيع لحوم على الأسر الفقيرة، كحافز لدعم نجله لاستكمال رحلة تفوقه فى السنوات المقبلة: «السنة دى الظروف كانت صعبة جداً وكنا قاعدين حاطين إيدينا على قلبنا، وقلقانين جداً، خصوصاً إن الطلاب كانوا بيمتحنوا فى ظروف صعبة مع انتشار فيروس كورونا، لكن الحمد لله السنة انتهت على خير ونجح وجاب مجموع كبير، وبكرة إن شاء الله هجيب شيف يطبخ اللحمة ونأكّل حبايبنا والناس الغلابة عشان الكل يدعى لابنى هو واللى زيه».
وعلى الرغم من أن «عثمان» ضحى منذ أيام قليلة فى عيد الأضحى، فإنه أصر على الذبح احتفالاً بنجاح ابنه: «كل ده مش خسارة فى ابنى طول ما هو بينجح وبيفرّحنى ومجتهد دايماً»، مستغلاً نجاح نجله لإطعام الأسر الفقيرة، خصوصاً فى ظل هذه الظروف الاقتصادية السيئة التى يمر بها الناس.
«بابا وعدنى هيجيب لى عربية لما أنجح فى الثانوية العامة، وفعلاً وفّى وعده معايا ودى حاجة مخليانى مبسوط أكتر عشان كان نفسى فى عربية»، بحسب عمر عصام، طالب ثانوية عامة ويقطن فى منطقة شبرا، وعلى الرغم من توتره الشديد أثناء الامتحانات، استطاع أن يجتاز الامتحانات بمجموع كبير: «كنت بذاكر كتير جداً عشان أقدر أجيب مجموع كبير وأدخل كلية الهندسة وآخد العربية من بابا».
وحصل مازن أشرف، طالب ثانوية عامة من منطقة شبرا، بسبب تفوقه فى الثانوية العامة، على هاتف محمول جديد: «موبايلى بقى قديم قوى وأول حاجة بابا وعدنى بيها بعد نجاحى بتفوق فى الثانوية إنه هيجيب لى موبايل جديد بكاميرا أحسن عشان بحب التصوير، وفعلاً على بكرة بالكتير هنزل أشترى الموبايل اللى نفسى فيه»، حسب مازن، الذى كان يقضى أكثر من 10 ساعات يومياً فى المذاكرة، وكانت هذه الساعات تزيد كلما اقترب موعد الامتحانات: «آخر شهرين ماكانش فيه دروس وأنا كنت معتمد بنسبة كبيرة عليها، وده خلانى أتوتر وأتلخبط، بس بعد كده عملت جدول لنفسى عشان مش أخسر وقتى ومذاكرتى، وكنت كل امتحان ببقى خارج منه وأنا متأكد إنى حليت كويس وإنى هقدر أجيب مجموع كبير زى ما وعدت بابا».
