حفلات رمضانية في شوارع دمياط: فقرة أغاني من العصر للمغرب

10:37 م | الأحد 26 أبريل 2020

الجلوس فى المنزل لفترة طويلة دون خروج حتى فى المناسبات الاجتماعية والدينية، مشكلة أصابت كثيراً من الأسر بملل واكتئاب خاصة الأطفال المعتادين على الحركة والنشاط، مما دفع الصديقتين إيناس الخولى وجوليا بارتى، إلى تقديم حفلات مجانية فى محافظة دمياط، حيث تجوبان الشوارع بسيارتهما، وتشغلان أغانى رمضان الشهيرة، وترقصان بدمية كبيرة على شكل بكار، بهدف إسعاد الأطفال ورسم البهجة على وجوههم.

«الأطفال مش حاسين برمضان ولا بهجته اللى اختفت عشان القاعدة فى البيت فقلنا ننزل بالعربية نفرَّحهم من بعيد لبعيد»، حسب «إيناس»، التى تجهز قائمة لأغانى رمضان ومنها «مرحب شهر الصوم، رمضان جانا، هاتوا الفوانيس»، وتقوم بتشغيلها بصوتٍ عالٍ والغناء والرقص مع الأطفال: «معانا ولد متطوع بيلبس لبس بكار وينزل يرقص ويغنى فى الشارع، والأطفال بيبصوا علينا من البلكونات وبيبقوا فرحانين أوى».

مبادرة «الفرحة للأطفال»، أطلقتها الصديقتان طوال أيام شهر رمضان المبارك، مع التزامهما بعدم الخروج أثناء ساعات حظر التجوال: «بننزل من بعد العصر لحد قبل المغرب بفترة بسيطة، وهو ده الوقت اللى فيه بيكون أفراد الأسرة كلهم متجمعين فى البيت». مؤكدة أنها تلقت ردود فعل إيجابية على المبادرة: «الأطفال خرجوا ماسكين العلم وفوانيس رمضان وقعدوا يغنوا معانا من البلكونات وكانوا مبسوطين قوى كأنهم خرجوا بره البيت»، كما تقوم الصديقتان بالتقاط صور تذكارية للأطفال مع بكار: «طفل واحد كان بينزل يتصور ويطلع تانى البيت عشان مانعملش زحمة فى الشارع»، وتعمل الصديقتان فى تنظيم حفلات الأطفال باستمرار: «دى حاجة إحنا متعودين عليها بس أول مرة ننزل نعمل حفلات فى الشارع».