دودو الجباس يحكى تجربته مع مصر للطيران وسفارة بلجيكا: الحكم لكم

11:31 م | الاثنين 30 مارس 2020

روى دودو الجباس، لاعب نادي بيراميدز، تجربته مع شركة مصر للطيران في بروكسيل، والسفارة البلجيكية في القاهرة.

وقال الجباس من خلال فيديو بثه الإعلامي أحمد موسى ببرنامج "على مسؤليتي"، المذاع على شاشة "صدى البلد": "قولت لازم أحكيلكم وإنتم ليكم الحكم.. كنت في مصر وحصل قرار الحظر واتقفلت المطارات، ومراتي وولادي في بلجيكا، وكنت عاوز أرجع أقضي معاهم الفترة دي.. صاحبي في بلجيكا قالي كلم السفارة لو المطار مقفول في طيارات إجلاء هما هيرجعوك على هنا، وكلمت السفارة أول أسبوع حد رد عليا وقالي ابعت إيميل بالعنوان والتفاصيل والباسبور وإحنا بنجمع البيانات للناس اللي في مصر وهنرجعهم على بلجيكا على طول" .

وتابع الجباس: "بعت الميل أكتر من مرة ومحدش رد عليا، وكلمتهم في التليفون 50 مرة علشان رد عليا واحد وقالي متقلقش ومحدش رد عليا، وكلمت رقم الطوارئ كلمني حد أجنبي بطريقة وحشة جدا وقالي منقدرش نعمل حاجة واستنى لحد ماحد يرد عليك".

واستكمل الجباس: "لقيت طيارة إجلاء لروما ومنها ترانزيت، ولقيت على الشاشة طيارة تانية رايحة لبروكسيل، ولما سألت قالولي دي تبع السفارة ومينفعش تحجزها، ولازم السفارة هي اللي تحجزلك، وكلمت السفارة قالولي الطيارة اللي طالعة أنت مش موجود فيها ومنعرفش السبب ابعت ميل.. ولقيت الطيارة اللي طالعة فاضية".

وتابع الجباس: "روحت روما ومنها لبروكسل اتبهدلت ودفعت فلوس كتير جدا.. واكتشفت بعدين أنه الطيارة اللي طالعة لبروكسل كانت الطيارة الأخيرة للإجلاء.. محدش عبرني وطريقة كلامهم في التليفونات وحشة جدا".

واستكمل الجباس: "قبلها بأسبوع كنت في بلجيكا وكان عندي تمرين ولازم أرجع مصر فكلمت شركة مصر للطيران قبل مايقفلوا المطارات في مصر، ساعدتني ولقتلي طيارة إجلاء من أمستردام وكمان قالوا لو ملحقتهاش هنطلعك من بروكسل بطيارة إجلاء".