بريد الوطن.. متاهة
بريد الوطن.. متاهة
يا أُم!!
ودينى الدنيا مِن غيرك
متاهة هَمّ
تشيلى الحِمل مِبتسمة
حنانك فى الزمن رسمة
بغيرها يُغُمّ
حياتى وضحكتى فِ الآن
بكام حمل انتى شيلتى زمان
تخطط وشك التجاعيد
وبيقولوا فيه يوم للأم
وغاب عن علمهم إنك
ف طلعة كل يوم العيد
صباحى ف كل يوم بَسمك
ندايا فى آخرتى باسمك
ديونك صعبة التسديد
أمى.. بادوق الجنّة فى حنانِك
يا رب يبارك أيامك
أنا لو عشت خَدّامك
هاعيش مبسوط
تعبتى سنين عشان أكبر
ولمّا كبرت زاد الحمل
يئست وقلت مش هاقدر
فقُمتى انتى تشدى الحبل
خدى من عمرى يامّا سنين
دانا عُمريّا بعدك موووت
نعيش من عمرى يامّا اتنين
باحب أصحى على دا الصوت
محمد خميس الحاوى
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي bareed.elwatan@elwatannews.com
