أحمد العوضي عن منع المهرجانات: قرار كوميدي جدا وقطع عيش
أحمد العوضي عن منع المهرجانات: قرار كوميدي جدا وقطع عيش
علق الفنان أحمد العوضي على قرار منع المهرجانات، قائلا إنه قرار كوميدي جدا، مؤكدا: "مدام بربي ابني كويس فبيشوف كل حاجة فهو قادر يميز الصح من الغلط، أنت اتحركت بناء على إيه؟".
وأضاف العوضي، خلال حوار ببرنامج "مساء DMC"، المذاع على شاشة "DMC"، الذي تقدمه الإعلامية إيمان الحصري: "القصة كلها أنهم طلعوا في الاستاد، فالناس قالت إزاي الاستاد ده بتاع نجيب محفوظ وبتاع عباس العقاد وعمرو دياب غنى فيه وقيمة وقامة فسخنوا في نقابة الموسيقيين فقالوا مينفعش نمنع الناس دي فبعد ما منعوها طلعوا وقالوا إزاي تمنعوا الناس دي أنت اتحركت بناء على إيه؟".
وتابع: "كنت فين أنت لما كان السكر محلي محطوط على كريمة، أنت شوفته وعديته وسمعته، ده أكل عيشهم ممنعوش، وفيه ناس حباه فنحترم بردو الناس اللي حباه".
وأكد أنه يجب تقنين هذه النوعية من الأغاني وليس منعها، "مش حلو إني أقطع عيش بني آدم، لكن أقوله الصح من الغلط، لو الكلام مضايقك أخليه يقول كلام مظبوط، مفيش فرح في مصر مبيشتغلش مهرجانات، أنت لغيت المهرجانات والأغنية الشعبية كلها أنا أبقى في فرحي أشغل إيه.. بديعة مصابني؟ يا جماعة قولوا كلام نفهمه، القرار مش منطقي".
