حلاق صعيدى يفرد شعر زبائنه بالنار: إديله مادة عازلة.. وولع فيه

08:09 م | السبت 27 يوليو 2019

«لا ماسكات ولا فورمالين، النار هى الحل»، شعار يرفعه عمر ناجى، 24 عاماً، حلاق من محافظة المنيا، الذى وجد فى استخدام النار حلاً مناسباً لفرد الشعر المجعد: «بقالى سنة هنا باستخدم الطريقة دى فى الصعيد، الشباب كانوا مستغربينها فى البداية لكن هى أفضل للشعر بدل ما أستخدم المواد الكيميائية».

عمل «عمر» بمهنة الحلاقة منذ 18 عاماً، جعلته خبيراً بكل خباياها، وملماً بما يحتاجه الزبائن وتتطلبه السوق: «فى أخطاء لو عملتها فى الطريقة الخاصة بالفرد ممكن تحرق شعر الزبون باحاول إنى أتجنبها بقدر الإمكان». فى البداية يقوم «عمر» بدهن شعر الزبائن باستخدام مادة عازلة وبعد ذلك يعرضه للنار مباشرة باستخدام أداة يطلق عليها «شمعة»: «الشعر باحط عليه حمام كريم مضاف إليه مادة مينك، بعد كده بعرضه للنار عن طريق سبراى كحل وشمعة بمسكها بإيدى، أهم حاجة لازم يكون الشعر مقصوص كويس جداً من الجناب عشان مفيش أى شعر يتحرق». 30 يوماً هى المدة التى يظل خلالها الشعر مفروداً وثابتاً: «الشعر بيفضل شهر كامل مفرود، مفيش فيه أى تجاعيد، ودى حاجة كويسة لأن هنا فى الصعيد درجة الحرارة العالية بتأثر على الشعر ممكن تخلى التجاعيد تظهر فيه».

وبحسب «عمر» فإنه يستخدم هذه الطريقة مع الزبائن الذين تبدأ أعمارهم من 12 عاماً: «أهم حاجة إن الزبون مايتحركش، يكون سهل السيطرة عليه، ممكن نعملها مع طفل لو هيفضل قاعد ثابت»، وتتراوح أسعار جلسات فرد الشعر بهذه الطريقة بين 40 و150 جنيهاً تختلف باختلاف طول الشعر: «اللى بيجرب الطريقة دى مرة بيكررها تانى وبيجيب معاه كمان أصحابه، أنا مبسوط جداً من الإقبال عليها، الطريقة دى مايقدرش يشتغلها غير واحد متمكن من الشغلانة وعارف هو بيعمل إيه كويس».