«على» يحول زجاجة الخمر إلى «أباجورة الحشمة».. وبـ100 جنيه

10:29 م | الأحد 02 يونيو 2019

«لو حرام آدينا بنعملها أباجورات»، جملة يرددها «على»، كلما اندهش شخص من أعماله الفنية، التى تعتمد على زجاجات الخمر، حيث يحولها إلى وحدات إضاءة «أباجورات»، بأشكال وأحجام مختلفة. على أشرف، 25 عاماً، يبدع فى صناعة المشغولات اليدوية، بأشكال تتسم بالأناقة والبساطة والجاذبية، وتمزج بين عديد من ألوان الربيع، المهنة التى احترفها منذ الصغر، بالعمل «صبى» فى محلات المشغولات الذهبية والمجوهرات.

يعيش «على» بروح فنان له نظرة مختلفة للأشياء، وهو ما جعله يميل إلى الابتكار فى أعماله الفنية، مثل استخدام زجاجات الخمر، لصناعة «أباجورات»: «من حوالى 6 شهور بدأت فى الشغلانة دى لما رُحت عشان أشترى أباجورة عاجبانى ولقيت أقل حاجة بـ1000 جنيه، استحرمت أدفع الفلوس وقُلت هعمل زيها فى البيت»، وسرعان ما نجحت أولى تجاربه، وصنع تحفة فنية.

يقوم الشاب العشرينى بشراء زجاجات قديمة، من محلات متخصصة فى بيع المتعلقات القديمة: «تكلفة الأباجورة بسيطة، وهى عبارة عن زجاجة متوسطة بـ10 جنيهات، وبرنيطة بعملها يدوى بقماش وحديد ميكلفش 50 جنيه». «أباجورات الحشمة والأدب»، لقب ساخر اختاره لصناعته، يتجنب من خلاله الشبهات، «الحمد لله مبشربهاش، بس بفهم فيها كويس، عشان بشترى الأزايز الفاضية كتير، ولازم أبقى عارفاها، خاصة إنها بتفرق فى شكل ولون وحجم الأباجورة»، ويقوم ببيعها بأسعار بسيطة لا تتعدى الـ100 جنيه: «عشان كل الناس تشترى»، ولا يستغرق وقتاً طويلاً فى تصنيعها: «بنضف الأزايز وأحط اللمبة فى البرنيطة بعد ما أعملها، وألحمهم ببعض».