كشف «أسنان» بصحبة «ميكى»: عيادة دى ولّا ملاهى

10:45 م | الخميس 17 يناير 2019

كرسى على هيئة ديناصور ضخم، بجانبه يقف «ميكى ماوس» حاملاً حوضاً صغيراً، بينما تنتشر على الجدران لوحات لشخصيات كرتونية شهيرة مثل «كرة البعبع»، وديكورات بألوان جذابة، تشد انتباه الطفل بمجرد أن يدخل عيادة الأسنان.

مى ماجد، وشقيقتها «بتول»، طبيبتا أسنان، قررتا أن تبدلا مشاعر الخوف التى تسيطر على جميع الأطفال أثناء فحص الأسنان، بمشاعر فرحة وحب للمكان والطبيبة، التى تستقبلهم بترحاب شديد، وتلعب معهم أثناء الكشف فى العيادة الأشبه بالملاهى، الموجودة فى منطقة حدائق الأهرام.

«حطيناهم وسط العالم بتاعهم والحاجات اللى بيحبوها، وقدرنا نخلصهم من عقدة الخوف اللى بتسيطر عليهم لما يسمعوا إنهم رايحين لدكتور الأسنان، وتفضيلهم أحياناً الشعور بالألم على زيارة الطبيب»، بحسب «مى»، التى تجد متعة كبيرة فى اللعب مع الأطفال المرضى بالدمى والشخصيات الكارتونية التى يفضلونها، ولا تمانع فى لمسهم وتفقدهم لأدوات الكشف حتى لا يخشوها: «لو الطفل لسه خايف بخليه يشوف الأدوات اللى هنكشف بيها ويمسكها ويلعب بيها، وأعقمها تانى أو أستخدم غيرها.

المهم أحببه فى عيادة الأسنان، عشان يحافظ على أسنانه». تشاركها بتول ماجد، العمل على امتصاص خوف الأطفال فى عيادة الأسنان بطرق غير تقليدية، من خلال تنظيم مسابقات شيقة، وتوزيع بعض الجوائز عليهم: «أسلوبنا نجح مع الأطفال، وحبوا العيادة وربطوا بين الكشف والهزار واللعب والاستمتاع، وبدل ما ييجوا العيادة بالضغط من أهاليهم والعياط، يدخلوا علينا بضحكة وحماس».